जनकपुरधाम, वैशाख १४ गते । जनकपुरधाम उप–महानगरपालिकाले कोरोना भाइरस रोकथाम एवं नियन्त्रणका लागि जारी लकडाउनबाट प्रभावित नगरवासीको राहतका लागि विभिन्न १२ वटा वडाका सात हजार ६ सय एक परिवारकालागि राहत सामाग्री पठाएको छ ।
उप–महानगरपालिका अनुसार प्रतिव्यक्ति १५ किलो चामल, १ लिटर खाने तेल, १ किलो नुन, हातधुने सावुन सय ग्रामको एउटा र ५०/५० ग्रामको दुईवटा र तरकारी र दालको नगद तीन सय गरि राहत पठाइएको छ ।
आइतवार सम्म विभिन्न १२ वटा वडा २,३,४,५,६,८,११,१४,१६,१७,१८ र २१ मा राहत पठाइएको छ । वडा २ मा ३ सय १५, वडा ३ मा २७०, वडा ४ मा एक हजार २९, वडा ५ मा १४७, वडा ६ मा ५८८, वडा ८ मा ७५४, वडा ११ मा ५८९, वडा १४ मा ६१५, वडा १६ मा ५४१, वडा १७ मा ९४१, वडा १८ मा ६१२, वडा २१ मा १२ सय घर परिवारकोलागि राहत पठाइएको छ ।
विश्वभरि फैलिएको कोभिड–१९ (कोरोना भाइरस) को महामारीको एक महिना भन्दा बढी भई सकेको अवस्थामा दैनिक ज्यालादारी र विपन्न परिवारहरुकोलागि जनकपुरधाम उप–महानगरपालिकाले जिवन यापनमा सहज हुनकोलागि सो राहत वितरण गरेका छन् । कोभिडि–१९ ले जनकपुरधाम सहित विश्वभरिका आम जनता प्रभावित भएका छन् ।
कुनै कुनै वडामा आइतवार देखिनै राहत वितरण गर्ने कार्य प्रभारम्भ गरिएको छ भने आइतवार देखि शुरु नभएका वडाहरुमा सोमवार देखि वितरण गर्ने कार्यक्रम रहेको वडाध्यक्षहरुले जानकारी दिएका छन् ।
मेयर लालकिशोर साहले उप–महानगरपालिका अभिभावक विहीन छैन, राहत वितरण कार्यक्रम निरन्तर जारी रहने र अगामी दिनमा पनि सहयोग गर्न जनकपुरधाम उप–महानगरपालिका तयार रहेको छ ।
उनले विपतको वेला स्वास्थ्यकर्मी, सफाई कर्मचारी र सञ्चारकर्मीको भूमिका अत्यन्तै महत्वपूर्ण रहने भएकाले म सवैमा अभार व्यक्त समेत गरेका छन ।
यसैबीच पर्सा जिल्लाको वीरगन्ज महानगरपालिका २ र ३ का दुई पुरुषमा पीसीआर परीक्षणका क्रममा पोजिटिभ देखिएको हो । यो संगै नेपालमा कोरोना पुष्टि हुनेको संख्या ५१ पुगेको छ ।
यसअघि कोरोना संक्रमणको पुष्टि भएका छपकैयास्थित मस्जिदमा बस्दै आएका तीन भारतीय जमातीसँगको सम्पर्कमा रहेका ती दुई जनामा कोरोना संक्रमणको पुष्टि भएको पर्साका सहायक प्रमुख जिल्ला अधिकारी ललित बस्नेतले बताएका छन ।
सहायक सीडीओ बस्नेतका अनुसार ती मध्ये वीरगन्ज ३ छपकैयाका ४९ वर्षीय पुरुषलाई प्रहरीले नारायाणी अस्पताल वीरगन्जमा ल्याएको छ । उनी वीरगन्ज महानगरको सरसफाइ शाखामा कार्यरत कर्मचारी रहेका छन् ।
अर्का वीरगन्ज २ घुसुकपुरका ५५ वर्षीय पुरुषलाई पनि भर्खरै अस्पताल ल्याइएको छ। उनलाई शंकास्पद ठानी सिदार्थ माविको क्वारेन्टाइनमा राखिएको थियो ।
कोरोना संक्रमित भारतीय जमातीसँग सम्पर्कमा रहेका वीरगन्ज मअहानगरो वडा नम्बर १, २ र ३ का १ सय ४६ जना र पर्सा जिल्लाका विभिन्न क्वारेन्टाइनमा राखिएका ४१ गरी १ सय ८७ जनाको स्वाब संकलन परीक्षणका लागि काठमाडौं पठाइएको थियो ।
सो मध्ये आइतबार बिहानसम्म ८२ जनाको रिपोर्ट आएको छ । जसमा दुई जनाका कोरोना भाइरस संक्रमण रहेको पुष्टि भएको सहायक प्रजिअ बस्नेतले बताए ।
यो विषयमा आफ्नो प्रतिक्रिया दिनुहोस् !