जनकपुरधाम, बैशाख १२ गते । चीन उत्पादित कोरोना भाइरस परिक्षण सम्बन्धी कीट र मेसिन सहित विभिन्न उपचार सामाग्री गुणस्तरहीन रहेको भन्दै भारत, नेदरल्याण्ड, चेकरिपब्लिक र स्पेनपछि नेपालको जनकपुरधामले पनि प्रयोगमा प्रतिबन्ध लगाएको छ ।
चीनबाट खरिद गरिएका प्रादेशिक अस्पताल जनकपुरधाम स्थित पीसीआर मेसिनले निगेटिव बाहेक अरु रिपोर्टै नदिने, त्यही रिपोर्ट अन्य ठाउँमा पोजेटिभ आउने गर्दा विश्वसनीय नरहेको भन्दै प्रदेश २ सरकारको सहमतिमा प्रयोगशालामा कार्यरत प्राविधिकले शुक्रवारदेखि सो मेसिनबाट चेकजाँच बन्द गरेको हो ।
चिनले कोरोना भाइरस विश्वभरि फैलाएर आफ्नो गुणस्तरहीन उपचार सामाग्री बिक्री वितरण गरिरहेको भन्दै विश्वका अधिकांश राष्ट्रले आरोप लगाउँदै आएका छन । हुनत नेपाल सरकारले अहिले पनि कुनै रिपोर्ट फरक आएमा मेसिन गलत रहेको भन्न नमिल्ने बताउंदै आएका छन ।
जनकपुरधाम स्थित सो प्रयोगशालामा जडित सो मेसिनबा हालसम्म सयौं परिक्षण भइसकेपनि हालसम्म एउटा रिपोर्ट पनि पोजेटिव देखाएको छैन, तर सोही नमूनामा काठमाडौ, धरान र हेटौडामा पोजेटिव देखाउने गरेको भनाई प्रयोगशालाका इन्चार्ज रामविनय साहको भनाई छ ।
सर्लाही जिल्लाको धनकौल गाउँपालिकाको वडा नम्बर ५ हरकटवा बस्ने १४ बर्षीय किशोरको रिपोर्टले फरक फरक रिजल्ट देखाएको घटनाले अन्ततः प्रादेशिक अस्पताल स्थित सो प्रयोगशालाले मेसिन विश्वसनीय नरहेको भन्दै सो मेसिनबाट परिक्षण बन्द गर्ने निर्णयमा पुगेको हो ।
प्रादेशिक अस्पताल जनकपुरधाममा रहेको प्रादेशिक जनस्वास्थ्य प्रयोगशालाका ईञ्चार्ज रामविनय साहले जनाए अनुसार पीसीआरमा किसोरको निगेटिव देखिएको थियो ।
आइसोलेशनबाट फिर्ता गरिएपनि क्वारेन्टाइनमा रहेका किसोरको कोरोना भाइरस पोजेटिव आएपछि जनकपुरधाममा भइरहेको परीक्षण बन्द गर्ने निर्णय गरेको ईञ्चार्ज साहले जनाए ।
चैत २१ गतेबाट प्रादेशिक अस्पतालमा पीसीआर(स्वाब)टेस्ट सुरु भएको थियो ।
हाल सम्म १ सयभन्दा बढी परीक्षण भएकोमा सबै निगेटिव नै आएकोछ भन्दै उनले सर्लाहीको किशोरको घटनाले मेसिनमाथि आशंका भएको बताए । उनले विहिवार ८ वटा स्वाब परीक्षण गरिएपनि शुक्रवारबाट परीक्षण नगरिने बताए ।
टेस्टको नतिजा गलत आएपछि प्राविधिकहरुको विहिवार बसेको बैठकले प्रदेश सरकारको समाजिक विकास मन्त्रालयलाई जानकारी गराएर यो मेसिनमा परीक्षण गर्न उपयुक्त नहुने ठहरगर्दै परीक्षण रोक्ने निर्णय गरिएको बताइएको छ ।
प्रदेश २ को प्रादेशिक अस्पताल जनकपुरधाममा मात्र स्वाब परीक्षणको ‘पोर्टेवल’ पीसीआर मेसिन रहेकोछ । एक दिनमा बढीमा ८ वटा स्वाब परीक्षण मात्र त्यो मेसिनले गर्ने क्षमता रहेकोछ । एक पटकमा ९६ जनाको स्वाब परीक्षण गर्ने मेसिन संघीय सरकारले उपलब्ध गराएपनि त्यो नारायणी अस्पताल बीरगञ्जमा जडान नै नभई थन्किएको छ ।
यसैबीच समाजिक विकास मन्त्री नवलकिशोर साहले भने सबै रिपोर्ट निगेटिभ नै आउने गथ्र्यो, चाइनिज मेसिन भरपर्दो नभएकाले मेसिनमा प्राविधिकहरुले आशंका गरेकाले तत्कालका लागि परीक्षण रोकिएको छ अन्य देशबाट गुणस्तरीय मेसिन मगाएपछि पुनः पीसीआर परिक्षण शुरु गरिनेछ ।
हाल प्रदेश २ मा कोरोना संक्रमितको संख्या ५ पुगेको छ । ३ जना पर्सा जिल्ला र १ जना रौतहट जिल्लामा यस अघि नै संक्रमित फेला परेका थिए । ५ जना मध्ये ३ जना भारतीय नगारिक हुन् ।
यो विषयमा आफ्नो प्रतिक्रिया दिनुहोस् !