जनकपुरधाम, वैशाख १० गते । महामारीको रुपमा फैलिदै गएको कोरोना भाइरसको दृष्टिगत गर्दै यस जानकी नवमी कुनै विशेष कार्यक्रम नगरी सामान्य पुजापाठ गरी मनाइने भएको छ ।
प्रत्येक वर्ष जनकपुरधाममा मनाइँदै आएको जानकी नवमीमा अन्य वर्ष झै यसवर्ष कोरोना भाइरस संक्रमणको महामारी फैलिएका कारण सरकारले लकडाउन लगाएपछि जानकी नवमी कुनै उत्सव नगरिने मन्दिर व्यवस्थापकले जनाएको छ ।
लकडाउनको पालना गर्दै जानकी नवमीको अवसरमा कुनै प्रकारको उत्सव आयोजन नगरिने जानकी मन्दिरका उत्तराधिकारी महन्थ रामरोशन दासले जानकारी दिए ।
प्रत्येक वर्ष वैशाख शुक्ल नवमीका दिन मनाइँदै आएको जानकी जन्मोत्सवका दिन जानकी मन्दिरले भव्य कार्यक्रमको आयोजना गर्दै आएको थियो । तर यसवर्ष मन्दिरभित्रै जानकी जन्मोत्सवको अवसरमा ९ दिनसम्म पूजा अराधना गरिने महन्थ दासले बताए ।
वैशाख १२ गते घटस्थापना हुनेछ भने जानकी जन्मोत्सव मन्दिरभित्रै वैशाख २० गते मनाइने छ भने कोरोना महामारी फैलिएकोले जानकी जन्मोत्सवका दिन घर घरमै विशेष आरती गर्न तथा दिपोत्सव गर्न महन्थ दासले आग्रह गरेका छन ।
यो विषयमा आफ्नो प्रतिक्रिया दिनुहोस् !