वीरगंज, वैशाख ९ गते । लकडाउनले समस्यामा परेका गरीब विपन्न परिवारलाई गुणस्तरहीन खाद्यान्न सामाग्री वितरण गरेको अभियोगमा बाराका एक मेयर प्रहरीले पक्राउ गरेको छ ।
जिल्ला प्रहरी कार्यालय, बाराबाट खटिएको प्रहरी टोलीले मंगलबार दिउँसो गुणस्तरहीन राहत वितरण गरेको उजुरीको आधारमा कलैया उपमहानगरपालिकाका मेयर राजेश रायलाई प्रहरीले पक्राउ गरेको हो ।
मेयर रायले राहतका नाममा गुणस्तरहीन चामल, दाललगायतका उपभोग्य वस्तु वितरण गरेको उजुरी परेपछि उनलाई नियन्त्रणमा लिएको जिल्ला प्रहरी कार्यालय, बाराका एसपी कृष्ण पंगेनीले जानकारी दिए ।
मेयर रायलाई अहिले अनुसन्धानका लागि जिल्ला प्रहरी कार्यालय, कलैयामा राखिएको छ । एसपी पंगेनीका अनुसार, उनीमाथि लागेको अभियोगबारे सोधपुछ गर्न नियन्त्रणमा लिइएको हो ।
कलैया उपमहागरपालिकाका वडा नम्बर २२ मटिअरीया, वडा नम्बर ७ र २० मा चैत २८ गते वितरण गरिएको चामल, दाल कुहिएको भेटिएको थियो । राहत लिएकाहरुले फिर्ता गर्दै वितरण गर्नेलाई कारवाही माग गरेका थिए ।
राहत वितरण कार्यमा संलग्न सातजनालाई यसअघि नै प्रहरीले नियन्त्रणमा लिएको थियो ।
यो विषयमा आफ्नो प्रतिक्रिया दिनुहोस् !