जनकपुरधाम, वैशाख ८ गते । कोरोना भाइरस रोकथाम नियन्त्रणका लागि जारी लकडाउनले आम जनतालाई निकै मार्का पर्दै गएको दृष्टिगत गर्दै सरकारले वैशाख १५ पछि लकडाउनको स्वरुप परिमार्जन गर्ने भएको छ ।
कोरोनाको जोखिमलाई तीन वर्गमा विभाजन गरेर त्यसै अनुसार लकडाउनको स्वरुपमा निर्धारण गर्ने तयारी थालिएको स्वास्थ्य तथा जनसंख्या मन्त्रालयले जनाएको छ ।
यस्तै तरिकाले वैशाख १५ पछि लकडाउन जाँदैन । यसको स्वरुपमा परिवर्तन गर्नेगरी तयारी गरेका छौं,’ स्वस्थ्य मन्त्रालयका विज्ञ सल्लाहकार डा. खेम कार्कीले संचारकर्मीसँग कुरा गर्दै भने, अन्य मन्त्रालयले पनि आ आफ्नै तरिकाले तयारी गरिरहेका छन् ।
सरकारले कोरोना भाइरस संक्रमण रोक्न चैत ११ गतेदेखि देशव्यापी लकडाउन गरेको छ । कार्कीले बढी संक्रमण देखिएको क्षेत्र (हट स्पट) मा अहिलेको भन्दा कडा लकडाउन गर्ने र बाँकी क्षेत्रमा लकडाउन क्रमशः खुकुलो गर्दै लैजाने योजना रहेको बताए ।
जोखिम कम रहेको क्षेत्रमा निजी सवारी साधन, कलकारखाना र खेतीपाती गर्न दिने सरकारको तयारी रहेको कार्कीले भने । सार्वजनिक यातायात चल्न नदिने तर मोटरसाइकल, कारलगायत व्यक्तिगत सवारी साधन चल्न दिनुपर्ने स्वास्थ्य मन्त्रालयको प्रस्ताव रहेको छ । जसअनुसार मोटरसाइकलमा एक जना मात्रै र कारमा चार जना मात्रै बस्न मिल्ने गरी सञ्चालन गर्न दिइनेछ ।
त्यसैगरी, सुरक्षात्मक विधि बनाएर केही औद्योगिक क्षेत्रमा कलकारखाना चल्न दिने तयारी छ । तर, कारखानाले त्यसमा काम गर्ने मजदुरको सुरक्षाको ग्यारेन्टी गर्नुपर्ने छ । निश्चित भौतिक दूरी कायम राखेर कृषि क्षेत्रको कामकाज पनि अघि बढाउने तयारी छ ।
स्वास्थ्य मन्त्रालय अन्तर्गतको इपिडिमियोलोजी तथा सरुवा रोग विभागका प्रमुख डा. वासुदेव पाण्डेले संक्रमित नभेटिएका क्षेत्रमा अहिलेको जस्तो कडा लकडाउन आवश्यक नपर्ने बताए । पाण्डेले लकडाउन खुुकुलो बनाउने विषयमा निर्णय गर्दा नेपालको मात्रै होइन, सीमा जोडिएको भारतको पनि संक्रमणको अवस्था विचार गरिने बताए ।
यो विषयमा आफ्नो प्रतिक्रिया दिनुहोस् !