जनकपुरधाम, वैशाख ५ गते । कोरोना भाइरस संक्रमणको उपचारका लागि जनकपुरधामस्थित प्रादेशिक अस्पतालको स्वामित्वमा रहेको नर्सिङ्ग कलेजको छात्रावासमा निर्माण भइरहेको आइसोलेसन वार्डको स्थानीयवासीले बिरोध गरेका छन ।
जनकपुरधाम वडा नं.१० का स्थानीयवासीहरुले शुक्रवार एक पत्रकार सम्मेलन गरी घनावस्तीको बिचमा रहेको छात्रावासलाई आइसोलेसन वार्ड निर्माणले गर्दा स्थानीयले असर पर्ने भन्दै बिरोध जनाएका छन ।
स्थानीय मनोज कुमार झाले सरकारले यहाँ छात्रावासमा आइसोलेसन वार्ड निर्माण गर्ने सरकारको अपरिपक्व निर्णय रहेको आरोप लगाए । स्थानीय जिवेश झाले अव्यवस्थित हिसाबले गरिदैं आएको यो निर्माण कार्य हाम्रो पूरै वडालाई खतरामा पुरयाउनसक्ने तर्फ सचेत हुन सम्बन्धित निकायलाई आग्रह गरे ।
स्थानीयको विरोधमा सहमति जनाउंदै वडाध्यक्ष मिथिलेश कर्णले अन्य वैकल्पिक स्थानतर्फ आइसोलेसन वार्ड सञ्चालन गर्नुपर्नेमा जोड दिएका छन ।
उनले भने प्रदेश सरकारसँग मुजेलियाको मणिपाल अस्पताल, बसहियाको इञ्जिनीयरिङ क्याम्पससहितको वस्ती विहित क्षेत्र विकल्प हुँदा हुँदै घनावस्तीमा आइसोलेशन वार्ड निर्माण गर्नु स्थानीयलाई जोखिममा पार्ने कुरा हो ।
यता प्रादेशिक अस्पताल जनकपुरका निमित्त मेसु डा.जामुन सिंहले स्थानीयहरुको बिरोधलाई स्वाभाविक रुपमा लिएका छन् । उनले ५० शैयाको लेभल २ तहको निर्माण भइरहेको आइसोलसन वार्ड हचुवातालमा होइन स्थानीयको सुरक्षालाई ध्यानमा राखेर नै निर्माण कार्य भईरहेको दाबी गरे ।
सिंहका अनुसार संघीय सरकारले गरेको निर्णय तथा निर्देशन अनुसार उक्त वार्ड निर्माणको काम शुरू गरिएको हो । हुन त पहिले पनि प्रादेशिक अस्पताल जनकपुरको इमर्जेन्सी वार्डको माथिल्लो तलामा १२ शैयाको आइसोलेसन वार्ड पहिलेदेखि नै सञ्चालनमा रहेको छ ।
संघीय सरकारले पछिल्लो समयमा प्रदेश २ को प्रादेशिक अस्पताल जनकपुर र नारायणी अस्पताल वीरगञ्जलाई लेभल २ को अस्पताल तथा सगरमाथा अस्पताल राजविराज र जनकपुरको जानकी मेडिकल कलेजलाई लेभल १ तहको कोरोनाको उपचार गर्ने अस्पताल निर्माण गर्ने भनेर निर्णय गरिएकाले नयाँ संरचना निर्माण भइरहेको छ ।
प्रादेशिक अस्पतालमा इमरजेन्सी बाहेक अन्य नियमित सेवाहरू समेत सञ्चालन गर्नुपरेको तथा ती सेवा सुविधा रहेको अस्पताल परिसरबाट बाहिर परिसरमा कोरोनाको अस्पताल सुचारू गर्नु भनेर निर्णय गरेपछि नर्सिङ क्याम्पसमा तयारी थालिएको उनले बताए ।
निमित मेसु डा. सिंहले संचारकर्मी सँग कुरा गर्दै भने स्थानीयको सुरक्षाको दृष्टिगत गर्दै आइसोलेसन वार्डमा रहेको सम्पूर्ण झ्याललाई सीलबन्द गर्नुका साथै एयर कन्डिसन (एसी)को जडान गरिनेछ । त्यसका बाहेक कोठामा सीसीटीभी क्यामेरा जडान हुनेछन् । बाहिर सडकमा स्प्रे समेत समय समयमा गरिनेछ ।
साथै उनले स्थानीयको सुरक्षाप्रति अस्पताल व्यवस्थापन सचेत छ, तर कसैको विरोधले हामीलाई रोक्न मिल्दैन संघ र प्रदेश सरकारले गरेको निर्णय र निर्देशन अनुसार आइसोलेसन वार्ड निर्माण भइरहेको छ ।
यो विषयमा आफ्नो प्रतिक्रिया दिनुहोस् !