वीरगञ्ज, चैत ३० गते । पर्साको वीरगञ्जमा तीन जना भारतीय नागरिकमा कोरोना संक्रमण पुष्टि भएपछि नेपालमा कोरोना संक्रमितको संख्या १२ पुगेको छ ।
प्राप्त जानकारी अनुसार गत बिहीवार विरगञ्जबाट तिनीहरुको नमूना परिक्षणका लागि हेटौडा पठाइएको थियो, त्यहाँ पोजेटिभ देखिएपछि राष्ट्रिय जनस्वास्थ्य प्रयोगशालामा पनि परिक्षण गरिएपछि पुनः पोजेटिभ रिपोर्ट आएपछि पुष्टि भएको हो ।
स्वास्थ्य मन्त्रालयका एक अधिकारीका अनुसार हेटौडा र राष्ट्रिय जनस्वास्थ्य प्रयोगशाला टेकुमा उनीहरुको नमुना परीक्षण गर्दा कोरोना संक्रमण पोजेटिभ देखिएको हो ।
भारतबाट आएका २४ जनासहित ३३ जनाको नमुना संकलन गरी गत बिहीबार परीक्षणका लागि हेटौंडा प्रयोगशाला पठाइएको थियो । जसमध्ये तीन जनाको प्रारम्भिक रिपोर्ट मिश्रित खालको आएको र पुनः परीक्षणका लागि टेकु पठाइएको हेटौंडा स्थित प्रयोगशालाका प्रमुख नारायण कार्कीले जानकारी दिए ।
वीरगञ्ज–२ छपकैया स्थित जामे मस्जिदमा बस्दै आएका उनीहरुलाई शुक्रबार नै नारायणी अस्पतालको आइसोलेसनमा राखिएको छ । संक्रमण पुष्टि भएकामध्ये २ जना उत्तरप्रदेश र एक जना दिल्लीमा बस्दै आएको बताइएको छ । उनीहरु १३ दिनदेखि वीरगञ्ज–२ छपकैयास्थित जामे मस्जिदमा आएको थियो स्थानीयले बताएका छन् ।
सप्तरीमा आयोजित मुस्लिम धार्मिक सभामा सहभागी हुन आएका उनीहरु त्यही बेलादेखि भारत फर्केका छैनन् । मार्च ४ तारिकमा रिटर्न ट्रेन टिकेट भए पनि लकडाउनका कारण उनीहरु रोकिएका थिए ।
लकडाउन खुलेपछि घर फर्कन भनी उनीहरुले १५ अप्रिलका लागि टिकट काटेका छन् । घर फर्कनुअघि एकपटक स्वास्थ्य जाँच गराउनु उपयुक्त सम्झेर उनीहरु आफैं नारायणी अस्पतालमा पुगेको मस्जिदका मौलाना अलि असगरले बताए ।
लुकेर बसेका २६ जना प्रहरी नियन्त्रणमा
यसैबीच कोरोना भाइरस संक्रमणको अवधिमा लकडाउनका बाबजुद वीरगंजका मस्जिदमा लुकेर बसेका १९ जमाती सहित २६ जनालाई प्रहरीले नियन्त्रणमा लिएका छन ।
प्रहरीले पक्राउ गरेका २६ जना मध्ये भारत दिल्लीको मुस्लिम तबलगती भेलामा सहभागी भएका १९ जना भारतीय जमाती समेत रहेका छन् ।
जिल्ला प्रहरी कार्यालय पर्साका अनुसार पक्राउ पर्नेहरु अन्यमा वीरगन्जका ३ जना मौलाना र भारतबाट पाहुना आइ बसेका ४ जना रहेका छन् ।
जिल्ला प्रहरी कार्यालय र वडा प्रहरी कार्यालय वीर्ताको प्रहरी टोलीले छपकैयाको मस्जिदबाट ११ र घुसुकपुरको मस्जिदबाट १५ गरी २६ जनालाई नियन्त्रणमा लिएर प्रहरीको स्कटिङमा क्वारेन्टाइनमा पुर्याएको उनले बताइन्।
यो विषयमा आफ्नो प्रतिक्रिया दिनुहोस् !