काठमाडौ, चैत १६ गते । महामारीका रुपमा फैलिएको कोरोना भाइरस नियन्त्रण सम्बन्धी नेपाल सरकारले चीनबाट खरिद गरिएको सामाग्री महँगो दरमा खरिद गरिएको आरोप लाग्न थालेको छ ।
आइतवार मात्रै चीनबाट काठमाडौ ओर्लिएको ती सामाग्री बजार भाउभन्दा दशौं गुणा महंगोमा खरिद गरिएको आरोप नेपाल चीनका व्यापार जानकार र एनआएरएनएले लगाएको भन्ने कुरा अनलाईन खबरको समाचार उल्लेख छ ।
चीनमा उद्योगीले विभिन्न देशलाई हाल उपलब्ध गराइरहेका यस्ता सामाग्रीको बजार भाउभन्दा अस्वभाविक महंगोमा नेपाल सरकारले सामान खरीद गरेको र ढुवानीका लागि चार्टर विमानको खर्च समेत व्योहर्नु परेको सो समाचारमा भनिएको छ ।
नेपाल सरकारले सामाग्रीको पहिलो नम्बरको सूचीमा रहेको गगल्सको मूल्य १८ डलरमा खरीद गरेको छ जबकि चीनमा सो गगल्सको मूल्य न्यूनतम २ डलरदेखि अधिकतम ४ डलरसम्म रहेको छ ।
एक लाख थान गगल्सलाई परल मूल्य भन्दा १७ करोड रुपैयाँ बढी तिरेको छ । एफडीए सर्टिफाइड थर्मोमीटरको अधिकतम बजारमूल्य २९ देखि ३३ डलर पर्नेमा नेपाल सरकारले खरीद गर्न लागेको थर्मोमीटरको मूल्य ६५ डलर परेको छ । १५ सय थान थर्मो्मिटरमा ७१ लाख रुपैयाँ अतिरिक्त बिल देखाइएको देख्रिन्छ ।
त्यस्तै, एक सेन्ट पनि नपर्ने डिस्पोजेवल जुत्तालाई नेपाल सरकारले २ डलर तिरेको छ भने २.५ डलर पर्ने रेस्पिरेटर मास्कलाई ७ डलर तिरेको छ । कोरोना परीक्षणका लागि पोर्टेबल पीसीआर टेस्टिङ किट ५० हजार थान खरीद गरिएको छ । प्रतिकिट ३८ डलरमा खरीद गरिएको छ । यसको अधिकतम मूल्य ९–१० डलर भन्दा बढी नपर्ने गैरआवासीय नेपाली संघ, चीनका केन्द्रीय सदस्य नविन बिकको भनाई छ ।
यसमा मात्रै १४ लाख डलर अर्थात १६ करोड रुपैयाँ भन्दा बढीको बिल देखाइएको उनको भनाइ छ ।१०–१५ प्रतिशत नाफा राख्नु अस्वाभाविक होइन ४००–५०० प्रतिशत महंगोमा खरिद गरेको देखेपछि बोल्न बाध्य भएको संचारकर्मीसँग कुरा गर्दै भने ।
एनआरएनएलाई टेण्डर दिइएन
सामान खरिदका लागि एनआरएनए चीनले सस्तो दरमा टेन्डर हालेपनि त्यसलाई दिइएन । उच्च सरकारी अधिकारीबाट प्राप्त सूचना अनुसार उसको टेन्डरमा एन–९५ मास्कको मूल्य जम्मा ०.९५ डलर ज्वरो नाप्ने ‘टेम्परेचर गन’ को २७ डलर, कभरलको ४ डलर, पिसिआर टेस्ट कीटको मूल्य १० डलर प्रस्ताव गरिएको थियो ।
एनआरएनए चीन आफैले सरकारलाई कोरोना रोकथाम सम्बन्धी सामग्री उपलब्ध गराउने घोषणा गरेको छ । सरकारले भने जिन्सीको सट्टा नगदै माग गरिरहेको छ ।
परराष्ट्रका एक सहसचिव भन्छन, ‘हामीले एनआरएनएलाई मास्क, कीट, पञ्जा होइन, नगदै चाहिन्छ भनेका छौं किनभने पैसा भएपछि हामी आफै किनिहाल्छौं नि ।
सामान किनेपछि छलफल
पछिल्लो दिनमा चिनियाँ कम्पनीहरुले निर्यात गरेको सामाग्रीहरु गुणस्तरहीन रहेको स्पेन, चेक रिपब्लिक र नेदरल्याण्ड जस्ता युरोपेली मुलुकहरुले आरोप लगाइसकेको अवस्थामा नेपालले चीनबाटै सो सामानहरु खरीद गरेका छन ।
नेपालले ल्याएको सामाग्रीको गुणस्तरको कसरी यकिन गरियो भन्ने विषयमा स्पष्ट पारिएको छैन । गुणस्तरहीन सामाग्री भएको आशंकामा स्थलमार्गबाट आउन लागेका ३६ हजार डलर बराबरका सामाग्रीलाई तिब्बत सरकारले शनिबार सीमानामा रोकिदिएको छ ।
यो विषयमा आफ्नो प्रतिक्रिया दिनुहोस् !