जनकपुरधाम, प्रदेश २ सरकारले विश्वभरि नै महामारीको रुप लिएका कोराना भाइरस (कोभिड १९) को दृष्टिगत २५ करोड रुपैया बराबरको राहत कोष स्थापना गरेको छ ।
मन्त्री परिषदको बिहीवार सम्पन्न बैठकबाट कोरोना भाइरसको नियन्त्रण तथा प्रभावित व्यक्तिको राहतका लागि २५ करोड रुपैयाको राहत कोषको स्थापना गरिएको हो । स्थापना संगै कोषमा सम्पूर्ण मन्त्रीहरुको एक महिनाको तलब राख्ने निर्णय पनि गरिएको छ ।
कोष स्थापना बारे जानकारी दिंदै सरकारका प्रवक्ता एवं आन्तरिक मामिला तथा कानून मन्त्री ज्ञानेन्द्र यादवले भने राहत कोषमा सहयोग गर्न अन्य समाजिक संघ संस्था, प्रदेशका व्यापारिक घराना एवं इच्छुक व्यक्तिहरुलाई आह्वान समेत गरिनेछ ।
बैठकबाट महामारी नियन्त्रणको लागी मुख्यमन्त्रीको संयोजकत्वमा सबै मन्त्री रहने गरि उच्च स्तरीय निर्देशन समिति र महामारी नियन्त्रणको लागि आवश्यक व्यवस्थापन गर्न निमित्त प्रमुख सचिव नारायण दवाडीको संयोजकत्वमा सबै मन्त्रालयका सचिव रहने गरि विशेष कार्यकारी समिति समेत गठन गरिएको जानकारी समेत उनले दिए ।
कार्यकारी समितिलाई बिहीवार नै मन्त्री परिषद बैठकबाट विशेष परिस्थितिमा महामारी नियन्त्रणको लागी आवश्यक व्यवस्थापन गर्न चाहिने आवश्यक सामाग्री खरिद गर्न निर्देशन समेत दिएको बताइएको छ ।
यसका साथै बैठकले लकडाउनका कारण समस्यामा परेका गरिव विपन्न र दैनिक ज्यालादारी गर्ने कामदार सहितका जनताहरुको लागी स्थानीय तह संग समन्वय गरेर तिनीहरुको घरमै खाद्यान्न लगायतका राहत उपलब्ध गराउने निर्णय पनि गरिएको उनले जनाए ।
मन्त्री परिषदले प्रादेशिक अस्पताल जनकपुर, विरगंज र राजविराजमा कोरोना सम्बन्धि जाँच गर्ने ल्याबको स्थापना गर्ने निर्णय पनि गरिएको छ ।
यो विषयमा आफ्नो प्रतिक्रिया दिनुहोस् !