जनकपुरधाम, कोरोना भाइरसबाट सर्तकता र बच्ने एक मात्र उपाय लकडाउन देशभरि नै लागू गरिएको छ ।
मंगलवार जनकपुर लगायत धनुषा जिल्ला भरि ‘लकडाउन’ को उलंघन गर्ने ३ सय ६९ सवारीसाधन प्रहरीले नियन्त्रणमा लिएको छ ।
जनकपुरसहित धनुषाको विभिन्न स्थानबाट बस, ट्रक, पिकअप र मोटरसाइकलसहित ३ सय ६९ सवारीसधान नियन्त्रणमा लिएको धनुषाका प्रहरी उपरीक्षक रमेश बस्नेतले जानकारी दिएका छन ।
लकडाउन अवज्ञा गर्ने ८ जना मासिन समेत जनकपुर लगायत धनुषा जिल्लाको विभिन्न स्थानबाट पक्राउ गरिएको उनले जनाए । तर तिनीहरुलाई दिनभर नियन्त्रणमा लिई साँझमा सम्झाइ बुझाई छाडिएको छ । नियन्त्रणमा लिइएको सवारीसाधन निषेधाज्ञा समाप्ति पश्चात मात्र छाडिने, बुधवारदेखि थप कडाई गरिने प्रहरी उपरिक्षक बस्नेतले बताएका छन ।
सडकमा सेना परिचालन
यसैबीच ‘लकडाउन’ को पूर्णरुपमा पालना गराउन प्रदेश २ को आठवटै जिल्लामा नेपाली सेनासहित तीनवटै सुरक्षा निकाय परिचालन गरिएको छ ।
प्रदेश २ का जिल्लाहरुमा लकडाउनको उलंघन हुन थालेपछि सडकमा सेना परिचालन गरिएको छ । प्रदेशका ८ वटै जिल्लामा ८ हजार भन्दा बढीको संख्यामा नेपाल प्रहरी परिचालन भएको हो । नेपाली सेनाका साथै सशस्त्र प्रहरी, नेपाल प्रहरी र गुप्तर निकायलाई समेत परिचालन गरिएको ।
धनुषा जिल्ला भरि ७–७ सयको संख्यामा नेपाल प्रहरी, सशस्त्र प्रहरी र नेपाली सेना परिचालन भएको धनुषाका प्रमुख जिल्ला अधिकारी कोषहरि निरौलाले जानकारी दिएका छन ।
त्यस्तै सिरहामा ८ सय नेपाल प्रहरी, तीन सय सशस्त्र प्रहरी, झण्डै २ सयको संख्यामा नेपाली सेना र अनुसन्धान प्रहरी परिचालन भएको जिल्ला प्रशासन कार्यालय सिरहाका प्रवक्ता एवं प्रशासकीय अधिकृत कमल आचार्यले जानकारी दिए । उनका अनुसार सिरहाको लहान, मिर्चैया, चोहर्वा, गोल बजार, बन्दीपुर लगायतको ठाउँहरुमा पनि नेपाली सेनाको टोली परिचालन गरिएको छ ।
यस्तै सप्तरी, महोत्तरी, सर्लाही, रौतहट, बारा र पर्सामामा पनि तीन वटै सुरक्षा निकायले आपसी समन्वय गरी लकडाउनलाई पालना गराउने काममा सक्रिय रहेको बताइएको छ । आठवटै जिल्लामा ३५ सयको संख्यामा सशस्त्र प्रहरी परिचालन भएको सशस्त्र प्रहरी प्रमुख प्रदेश २ का डीआईजी राजु अर्यालले जनाएको छ ।
यो विषयमा आफ्नो प्रतिक्रिया दिनुहोस् !