जनकपुरधाम, प्रदेश २ को स्थायी राजधानी र नामाकरणका लागि चैत ४ गते गोप्य मतदान हुने भएको छ ।
शुक्रवार बसेको प्रदेश सभाको बैठकमा प्रदेशको नाम र राजधाननी तोक्न गोप्य मतदानका लागि प्रस्तुत गरिएको प्रतिवेदनमाथि छलफल गर्दै चैत ४ गते ८ बजे बिहान मतदान गर्ने सर्वसम्मतिले निर्णय गरिएको राजपा प्रमुख सचेतक परमेश्वर साहले जानकारी दिएका छन ।
अध्ययन विशेष समितिले गोप्य मतदानका लागि तयार पारेको प्रतिवेदन राजपाका प्रमुख सचेतक परमेश्वर साहले प्रस्तुत गरेको थियो । समितिको संयोजक सभामुख सरोजकुमार यादव रहेपनि उनकै निर्देशनमा सचेतक साले सो प्रतिवेदन पेश गरेको थियो ।
समितिमा राजधानीका लागि बाँकी रहेको जनकपुरधाम र विरगंज सहित ३ वटा प्रस्ताव र नामाकरणका लागि रहेको ४ वटा प्रस्तावमा निर्वाचन गरिने प्रतिवेदनमा भनिएको छ । प्रतिवेदन अनुसार राजधानी जनकपुरधामका लागि सत्तारुढ दल समाजवादी र राजपा, प्रतिपक्षी नेकपा र कांग्रेसले संयुक्त रुपमा जनकपुरधाम तथा केही कांग्रेस र समाजवादीका बिरगंज प्रस्ताव राखेको छ ।
त्यसैगरी नामाकारणका लागि सत्तारुढ दलबाट मधेश प्रदेश, प्रतिपक्षी कांग्रेसले मिथिला, नेकपाले जानकी र कांग्रेस र समाजवादीका केही सांसदहरुले मध्य मधेश भन्ने प्रस्ताव राखेको हो ।
यसअघि प्रमुख सचेक सम्मिलित बैठकले सभाका सचिव निर्वाचन अधिकृत रहनेगरी निर्वाचनको कार्यविधि र आचार संहिता तयार पारेर सभामुख यादवलाई बुझाइसकेको छ ।
बैठकमा कसले के भने
शुक्रवार बसेको बैठकमा मुख्यमन्त्री लालबाबु राउतले उपभोक्ता समितिले गरेको भुक्तानी नभए आफै धर्नामा बस्न तयार रहेको चेतावनी दिएका छन ।
अढाई महिना पछि बसेको प्रदेशसभामा प्रदेशसभा सदस्यहरुले भुक्तानी हुन नससक्नुमा प्रदेश सरकार जिम्मेवार रहेको आरोप लगाएपछि मुख्यमन्त्री राउतले जवाब दिदै आफै धर्नामा बस्न तयार रहेको बताएका हुन् ।
मुख्यमन्त्री राउतले प्रदेश भरीमा उपभोक्ता समितिहरुले गरेको कामको भुक्तानीका लागि आफूले ईमान्दार प्रयास गरिरहेको बताए । उनले भने ‘सदनमा प्रदेशसभामा प्रदेश सरकारमाथी नै प्रश्न उठेकोले आउनुस जनकपुरधामको कुन चोकमा धर्ना बस्नु त्यही संगै धर्नामा बसौँ, को ईमान्दार छ वा छैन सबै स्पष्ट भइहाल्छ ।
उनले प्रदेशसभा, मन्त्रीपरिषद समेतबाट भुक्तानीका लागि निर्णय भएपनि भुक्तानी हुन नसक्नुमा प्रदेश सरकार दोषी नरहेको दावी गरे । मुख्यमन्त्री राउतले भने ‘मन्त्रीपरिषदले निर्णय गर्ने हो, भुक्तानी होइन,’ अगाडी भने मन्त्रीले चेकमा साइन गर्ने होइन नि, साइन त सचिवले नै गर्ने हो, मन्त्रीले निर्देशन मात्रै दिने हो ।
यस प्रदेशसभा बैठकमा प्रदेशसभा सदस्य उपेन्द्र महतो प्रदेश सरकार बिरुद्ध आक्रामक रुपमा प्रस्तुत भएका थिए । उनले प्रदेश सरकारको मन्त्रीपरिषदका सदस्यहरुकै कारण प्रदेश भेन्टिलेटरमा पुगी सकेको आरोप लगाए ।
प्रदेशसभा सदस्य महतोले अहिले प्रदेशको नाम र राजधानी तोक्ने कुरो चलि रहेको छ तर प्रदेशलाई भेन्टिलेटरबाट बाहिर निकाल्नु पहिले आवश्यक रहेको बताए ।
उनले पूरै विश्व कोरोना भाइरसबाट त्रस्त रहेको समयमा प्रदेश २ पेमेन्ट नामक भाइरसबाट त्रस्त रहेको बताए । महतोले भने‘ विश्वभरी फैली रहेको कोरोनाबाट १ लाख व्यक्ति प्रभावित छन् तर प्रदेश सरकारले फैलाएको पेमेन्ट भाइरसबाट ३ लाखभन्दा बढी व्यक्ति प्रत्यक्ष प्रभावित छन् ।’
अर्का प्रदेशसभा सदस्य मञ्जु यादवले भने ‘असहयोग गर्ने कर्मचारीको नाम सार्वजनिक गर्नुस, नभए कर्मचारीमाथी दोष लगाउने बानी छोड्नुस ।’
यो विषयमा आफ्नो प्रतिक्रिया दिनुहोस् !