लोक समाचारदाता
जनकपुरधाम, फागुन २१ गते ।
प्रदेश २ का मुख्यमन्त्री लालबाबु राउतले समाजमा व्याप्त लैगिंक हिंसा अन्त्यका लागि महिला शिक्षा र रोजगारी आजको आवश्यकता रहेको बताएका छन ।
बुधबार जनकपुरधाममा आयोजित समग्र लैंगिक उत्तरदायी तथा जवाफदेही न्यायमा पहुँच सुदृढिकरण परियोजना (सहज) को प्रदेशस्तरीय कार्याशाला गोष्ठीमा मुख्यमन्त्री राउतले समाजमा रहेको लैगिक हिंसा र विभेद अन्त्यका लागि प्रदेश सरकारले बेटी पढाउ बेटी बचाउ जस्ता अभियान सञ्चालन गरेको जानकारी दिए ।
छोरी परिवारको बोझ नरहेको भन्दै उनले यस प्रदेशमा जन्मिने हरेक छोरीहरुको लागि छोरी बिमा कार्यक्रम सञ्चालित रहेको र विमाको उदेश्य छोरीको विहेको लागि नभई तिनीहरुको उच्च शिक्षाको लागि रहेको बताए ।
प्रदेश भित्र अहिले पनि लैंगिक विभेद र हिंसाका बिभिन्न स्वरूपहरू देखा परेकोले मधेशी समाजमा पुरुष र महिलालाई हेर्ने दृष्टिकोणमा परिवर्तनको खाँचो रहेको मुख्यमन्त्री राउतले बताए ।
त्यस्तै प्रदेश २ का मुख्यन्यायधिवक्ता दिपेन्द्र झाले छोरी शिक्षाका लागि बिमा कार्यक्रमले प्रदेश नम्बर २ मा लैगिंक रुपान्तरणमा निकै सहयोगी हुने विश्वास व्यक्त गर्दै हरेक निकायमा महिलाको पहुँचका लागि ५० प्रतिशत आरक्षणको व्यवस्था गरेको बताए ।
प्रदेश नीति आयोगका उपाध्यक्ष प्रा.डा. भोगेन्द्र झाले समाजिक रुपान्तरणका लागि आर्थिक सबलता र छोरीलाई अध्ययन अध्यापन तर्फ केन्द्रितसंगै विभिन्न निकायमा सहभागिताका लागि प्रोत्साहन आवश्यक रहेको बताए ।
अधिकारका लागि आन्दोलन जान महिलाहरु तयार
कार्यक्रममा महिला अधिकारकर्मीहरुले लैंगिक हिंसा र महिलामाथि हुने विभेद विरुद्ध विद्यमान कानून पर्याप्त नरहेको भन्दै छुट्टै कानूनको व्यवस्था गर्नुपर्ने कुरामा जोड दिईन । उनीहरुले महिला हिंसा र लैंगिक विभेद अन्त्य गर्न कडा कडाभन्दा कानून नल्याइए आन्दोलनमा समेत जाने चेतावनी दिए ।
उनीहरुले भनिन् यस देशमा बिना आन्दोलनको कुनै पनि अधिकार भेटदै न त्यसैले महिलाहरुको हकअधिकार सुनिश्चित र तिनीहरुको संरक्षण तथा सुरक्षाका लागि आफूहरु आन्दोलनमा जान तयार छौं ।
साथै ती महिला अधिकारकर्मीहरुले महिला हिंसा र विभेद विरुद्ध केही कानून बनेपनि एकल महिलाका लागि कुनै कानून नरहेको कारण सरकारले एकल महिलाको अधिकारका लागि छुट्टै कानून निर्माण गर्नुपर्ने मांग गरिन ।
यो विषयमा आफ्नो प्रतिक्रिया दिनुहोस् !