प्रदेश २ मा ३ हजार ४ सय किलोमीटर सडक निर्माण र बस संचालन

लोक समाचारदाता
जनकपुरधाम, फागुन २ गते ।

प्रदेश २ सरकारले प्रदेशको स्तोरन्नतिका लागि संघ सरकारको रणनीतिकमा नपरेका करीब ३ हजार ४ सय किलोमीटर सडक निर्माण गर्ने गुरुयोजना अघि सारेको छ ।

शुक्रवार भौतिक पुर्वाधार विकास मन्त्रालयले आफ्नो प्रगति विवरणबारे जानकारी दिने उद्देश्यले आयोजना गरेको पत्रकार सम्मेलना पहिचान गरिएका ३ हजार ३ सय ९२ किलोमीटरको प्रादेशिक सडक निर्माण गर्ने दिर्घकालिन योजना अघि सारिएको बताइएको छ ।

प्रदेशका भौतिक पुर्वाधार विकास मन्त्री जितेन्द्र सोनलले प्रादेशिक लोकमार्ग एक हजार ४ सय ९७, सहायक प्रादेशिक लोकमार्ग १ हजार दुई सय ६१ र अन्य प्रादेशिक सडक ६ सय ३४ गरी कुल ३ हजार ३ सय ९२ किलोमीटर सडक निर्माण गरिने जानकारी दिए ।

उनले भने ५/५ वर्ष गरी १५ वर्षिय दिर्घकालिन योजना अन्तर्गत प्राथमिकताको आधारमा पहिचान गरिएका सडक, पुलपुलेसा सहित मरम्मत सम्भार गरिने छ । सडक निर्माणतर्फ ८३ अर्ब १६ करोड, पुलपुलेसा निर्माण तथा मरम्मत सम्भारतर्फ १० अर्ब ५३ करोड र सडक मरम्मत सम्भारतर्फ ३ अर्ब ७२ करोड खर्च लाग्ने अनुमान गरिएको उहाँले जानकारी दिए ।

कुल ९७ अर्बभन्दा बढी खर्च अनुमान गरिएको प्रदेशको आम्दानी विभिन्न श्रोत र बजेट गरी प्रतिवर्ष मात्र १ अर्ब ४२ करोड रुपैया रहेको छ । सो सडक निर्माणका लागि बांकी ७२ अर्ब ८९ करोड अपुग रकमको लागि संघ सरकारको सहयोगमा विभिन्न दातृ निकायसँग पहल गर्ने जानकारी समेत मन्त्री सोनलले दिए ।

संघीय सरकारको रणनैतिक सडक सञ्चालमा नपरेका सडक, राष्ट्रिय लोकमार्गबाट जिल्ला सदरमुकाम जोडने सडक, प्रदेशभित्र एक जिल्ला सदरमुकामबाट अर्को जिल्ला सदरमुकाम जोड्ने सडक र दुई राष्ट्रिय लोकमार्ग जोड्ने सडक निर्माण गर्ने सो योजनामा समेटिएको छ ।
गत आर्थिक वर्षमा प्रदेश सरकारले सो मन्त्रालय मार्फत १ हजार १ सय ३ किलोमिटर सडक निर्माण गरेको छ । जसमध्ये पक्की र ग्राभेल ३ सय ७५ र कच्ची सडक ७ सय २७ किलोमिटर रहेको छ ।

यसका साथै प्रदेश सरकारले पुर्व सप्तरीदेखि पश्चिम पर्सासम्मका लागि सहुलियत दरको आफ्नै बस सेवा संचालन गर्ने तयारी समेत थालेको छ ।

मन्त्री सोनलले प्रदेश सरकारले तत्काल पाँचवटा सञ्चालन गर्ने तयारी गरेको जानकारी दिए । पहिलो चरणमा बस सञ्चालन गर्न टेन्डर प्रक्रिया अन्तिम चरणमा रहेको जानकारी दिए ।
उनले भने ‘टेन्डर प्रक्रिया अन्तिम चरणमा पुगिसकेको छ, केही दिनभित्रै टेन्डर निकाल्ने तयारीमा हामी छौं, यो प्रक्रिया पूरा भएलगत्तै प्रदेश सरकारले आफ्नै बस सञ्चालन गर्नेछ ।

मन्त्री सोनलले पहिलो चरणमा राजधानी जनकपुरदेखि पूर्व राजविराज र पश्चिम वीरगंजसम्म तथा वीरगंजदेखि राजविराजसम्म बस सञ्चालन हुने बताए ।

प्रशासनिक कामका लागि जनकपुर पुग्नेहरुको समस्यालाई मध्यनजर गरी प्रदेश सरकारले यस्तो योजना ल्याएको भन्दै मन्त्री सोनलले काठमाण्डौंमा सञ्चालन भइरहेको साझा बस अनुसारकै बस खरिद गर्ने तयारी रहेको जानकारी दिए ।