लोक समाचारदाता
जनकपुरधाम, फागुन २ गते ।
धनुषाको मिथिला नगरपालिकाका हत्या गरिएका अवैद्य खोला उत्खनन अभियन्ता दिलिप महतोको हत्या आरोपमा तीन जनालाई पुर्पक्षका लागि जेल चलान र ३ जनालाई रिहा गरिएको छ ।
जिल्ला अदालत धनुषाका न्यायाधीश केशवप्रसाद घिमिरेको इजलासबाट क्रसर सञ्चालक विपीन महतो, टिपर चालक मुनिन्द्र महतो, लोडर चालक रञ्जित भनिने जितेन्द्र महतो पुर्पक्षका लागि जेल चलान गरिएको हो ।
त्यस्तै पक्राउ मध्येका दिलीपसंगै खोलामा गएका छिमेक साथी रोशनकुमार यादव, घटनामा संलग्नता देखिएका सत्यनारायण महतो र शत्रुधन महतो जनही २५ हजार धरौटी साधारण तारेखमा रिहा भएको जिल्ला अदालत धुनषाले जनाएको छ ।
हत्यामा क्रसर संचालक विपीन महतो, टिपर चालक मुनिन्द्र महतो र सह चालक जितेन्द्र महतोको संलग्नताको आधार, प्रमाण देखिएकाले थुनछेक प्रयोजनका लागि थुनामा राख्ने आदेश दिएको अदालतले जनाएको छ ।
अदालतले जनाए अनुसार रोशनकुमार यादवका हकमा घटना लगत्तै खबर गरेको र रोशन–दिलीपबीच कुनै किसिमको वैमनश्य नरहेका देखिएका र उनी संगै सत्यनारायण र शत्रुधनको समेतको घटना प्रत्यक्ष संलग्नता नदेखिएकाले तारेखमा रिहा गरिएको हो ।
गएको पुस २५ गते विहान घर नजिककैको औरही खोलामा भइरहेको अवैध उत्खनन रोक्न गएको बेला टिपरले किचेर धनुषाको मिथिला नगरपालिका ५ श्रीपुरका २४ वर्षीय युवक दिलीप महतोको हत्या भएको थियो ।
जिल्ला प्रहरी कार्यालय धनुषाले उनीहरुलाई पुस २७ गते राति पत्रकार सम्मेलन गरी दिलिपलाई फलामको लिभरले कोंखामा घोची हत्या गरी घटनालाई दुर्घटनामा परिणत गर्न टिपरले किचिएको जनाएको थियो ।
यो विषयमा आफ्नो प्रतिक्रिया दिनुहोस् !