लोक समाचारदाता
जनकपुरधाम, माघ १९ गते ।
विकारल रुप लिंदै गएको कोरोना भाइरसबाट नेपाली नागरिकलाई बचाउन नेपाल सरकारले चीनको हुबेई प्रान्तमा विशेष विमान पठाउने तयारी गरेको छ ।
कोरोना भाइरस सङ्क्रमण सुरु भएको चीनको हुवेई प्रान्तमा रहेका सबै नेपालीको उद्धार गर्न सरकारले विमान पठाउन लागेको हो । बेइजिङस्थित नेपाली दूतावासले शनिबार सूचना जारी गर्दै हुबेईमा रहेका नेपालीको उद्धार गर्ने र इच्छुक व्यक्तिलाई सम्पर्कमा आउन भनेको छ ।
यसअघि त्यस क्षेत्रमा रहेका नेपालीले आफूहरूलाई तत्काल उद्धार गर्न सरकारसँग माग गरेका थिए । नेपालीको उद्धारका लागि एउटा विशेष चार्टर्ड विमान पठाइन लागेको र त्यसबारे विस्तृत विवरण चाँडै सार्वजनिक गरिने सूचनामा जनाइएको छ ।
चीनसहित २० देशमा कोरोना भाइरस संक्रमण भएपछि विश्व स्वास्थ्य सङ्गठनले ‘विश्वव्यापी स्वास्थ्य संकट’ घोषणा गरेको छ । चीनमा ११ हजार भन्दा बढी व्यक्तिमा कोरोनाभाइरसको सङ्क्रमण भएको पुष्टि भएको छ भने अहिलेसम्म ३ सय ४४ जनाको मृत्यु भइसकेको छ ।
चीनबाहिर नेपालसहित २२ देशमा सयजना भन्दा बढी व्यक्तिमा सङ्क्रमण भएको विवरण प्राप्त भएको छ ।
यो विषयमा आफ्नो प्रतिक्रिया दिनुहोस् !