लोक समाचारदाता
जनकपुरधाम, माघ १६ गते ।
देशभर सहित जनकपुरधाममा पनि वसन्त पञ्चमीका दिन सरस्वती पुजा धुमधामका साथ मनाइएको छ तर केही माता सरस्वतीको व्यंगात्मक प्रतिमा बनाई आस्थामाथि प्रहार नै गरिएको छ ।
हिन्दु धर्ममा माता सरस्वतीको वाहन हँस रहेको विभिन्न धार्मिक ग्रन्थमा उल्लेख छ । तर जनकपुरधामको जानकी चोकमा युवाहरुको समूहले माता सरस्वतीको वाहन उँट र भगवान गणेशले मोबाइल बोकेको प्रतिमा बनाई पुजापाठ गरेको छ ।
त्यसैगरी शिवचोक स्थित गंगा सागरको डिलमा माता सरस्वतीको वाहन शेषनाग रहेको प्रतिमा बनाई पुजापाठ गरिएको छ । युवाहरुको समूहले धार्मिक आस्थामाथि खेलवाड हुने गरी मनाएको सरस्वती पूजनोत्सवको नागरिक समाजका अगूवाहरुले कडा विरोध जनाएको छ ।
निजी विद्यालयहरुको संगठन प्याबसन प्रदेश २ का सचिव विश्वलाल सिंहले भगवानको पूजापाठ गर्नु राम्रो कुरो हो, तर भगवानलाई मजाक बनाउने गरी पूजापाठ गर्नु भनेको आस्थामाथि खेलवाड गर्नु हो, यसप्रति सम्बन्धित निकायले ध्यान पुरयाउनु जरुरी रहेको भने ।
त्यसैगरी एनप्याबसनका जिल्ला अध्यक्ष अवधेश तिवारीले भने विद्यालय बाहेक विभिन्न चोकहरुमा उच्चश्रृंतल रुपमा भइरहेको सरस्वती पूजनोत्सव र डिजे बाजामा रोक लगाउन उपमहानगरपालिका तथा जिल्ला प्रशासन कार्यालयलाई लिखित रुपमा निवेदन दिएपनि कुनै सुनुवाई भएन । त्यसको प्रतिफल आज विद्याकी अधिष्ठात्री माता सरस्वतीको प्रतिमासँग खेलवाड गरिएको हो ।
त्यस्तै नागरिक समाजका अमरचन्द्र अनिल यसलाई विकृतिको संज्ञा दिएका छन । उनले भने ‘हामी आफ्नो संस्कृतिमाथि आफै प्रहार गरिरहेका छौँ, यसलाई निरुत्साहित गर्नुपर्छ बताउंदै यस प्रकारको विकृतिलाई विद्यालय प्रशासन, स्थानीय सरकार तथा प्रदेश सरकार दोषी रहेको छ ।
यता जानकी चोक पूजा समितिका आयोजक युवा सुशिल कर्णले आफूहरु संस्कृतिमाथि प्रहार नगरेको प्रतिक्रिया दिएका छन । उनले भने जनकपुरधाममा बढ्दै गरेको विकृति बिरुद्ध आफूहरुले सांकेतिक रुपमा बिरोध हो ।
उनले जनकपुरधाममा पहिला परिक्रमा सडकभित्र माटोको प्रतिमाको बनाई पुजापाठ गर्न बन्देज गरिएको तर अहिले आएर चोक चोकमा माटोको प्रतिमा बनाई भइरहेको पूजापाठको विरोध स्वरुप यसप्रकारको प्रतिमा बनाई पूजाको आयोजना गरिदैछ, जबसम्म परिक्रमा सडक भित्र माटोको प्रतिमा बनाई पूजापाठ गर्ने परम्परा बन्द हुदैन तबसम्म हाम्रो विरोध जारी रहनेछ ।
यसैबीच धनुषाका प्रमुख जिल्ला अधिकारी प्रदीपराज कणेलले भने पुजापाठ गर्नु गराउनु सबैको आस्था हो, हामीले कसैलाई रोक्न सक्दैनौ, जहाँसमम माता सरस्वतीको व्यंगात्मक प्रतिमा बनाई खेलवाड गरिएको कुरा हो, त्यसमा हामी भनदा यहाँका संस्कृतिविद र आम नागरिकलाई अघि बढनुपर्छ ।
माता सरस्वतीको अपमान हुने गरी प्रतिमा बनाई पूजापाठ मात्रै होइन विभिन्न पूजनोत्सव स्थलमा भोजपुरी र हिन्दी भाषाको अश्लील गित र त्यसमा नृत्य जस्ता कार्य समेत भएको छ । ती पूजनोत्सव स्थलमा धार्मिक गीतको सट्टा डिजे बाजामा अश्लील गीत र नृत्यप्रति समेत नागरिक समाजका अगूवाहरुले विरोध जनाएका छन ।
यो विषयमा आफ्नो प्रतिक्रिया दिनुहोस् !