लोक समाचारदाता
जनकपुरधाम, माघ १३ गते ।
प्रदेश २ का राजधानी जनकपुरधाम स्थित राजर्षि जनक विश्वविद्यालयमा प्राध्यापकहरुले तालाबन्दी गरेका छन ।
सोमवार विभिन्न मांगहरु अघि सार्दै राष्ट्रिय लोकतान्त्रिक प्राध्यापक संघले विश्वविद्यालयलाई पार्टीकरण परिणत गरेको भन्दै तालाबन्दी गरेको हो ।
संघले विश्वविद्यालय जस्तो गरिमामय ठाउँलाई सटरमै सञ्चालन गरि विश्वविद्यालयको साख र गरिमा धुमिल पार्न खोजिएको बिरोधमा तालाबन्दी गरेको प्रा. डा. बिनोद साहले बताए ।
विश्वविद्यालयको भौतिक संरचना आवश्यक पुर्वाधार सहित शैक्षिक तथा प्राज्ञिक गतिविधिमा सुधार, विश्वविद्यालयको पदाधिकारी, कर्मचारी तथा प्राध्यापकको भर्ना प्रक्रिया पारदर्शी सहितको माग संघको रहेको छ ।
संघले पदाधिकारीद्वारा श्रोत साधनको दुरुपयोगको नियमन, मौलाउँदै गरेको अनियमित तथा चरम भ्रष्टाचार नियन्त्रणको माग समेत राखेको छ । तराई मधेशको समग्र बिकास अनुरुप दक्ष जनशक्ति उत्पादनका लागि आवश्यक शैक्षिक तर्जुमा गरी पाठ्यक्रम तथा कार्यक्रम लागू गर्न, उच्च शिक्षा अध्ययन अनुसन्धानका लागि विश्वविद्यालयको गुरुयोजना तयार गर्नुपर्ने माग उनीहरुको छ । साथै बिश्वविद्यालयको सबै सरोकारवाला तथा प्राज्ञिक संघ संगठनको सम्मानजनक सहभागिको सुनिश्चितताको माग पनि राखेको छ ।
राष्ट्रिय लोकतान्त्रिक प्राध्यापक संघका केन्द्रिय उपाध्यक्ष डा. बिनोद साहले भने, ‘विश्वविद्यालय जस्तो गरिमामय ठाउँलाई काँग्रेसीकरण गरियो, कर्मचारी भर्ना देखि प्राध्यापक नियुक्ति सम्ममा योग्यता, क्षमतालाई अवमुल्यन गरी भर्ति केन्द्र बनाईयो, हामीलाई हाम्रो अस्तित्व जोगाउन हम्मे–हम्मे भएपछि तालाबन्दी गर्न बाध्य भएका हौ ।
पुस २७ गते बिभिन्न माग सहित उपकुलपति भरत झालाई ध्यानाकर्षण सहित अल्टिमेटम पत्र बुझाएपनि सुनुवाई नगरिएपछि रजिष्टार, डिन सहितको कार्यालयमा तालाबन्दी गरिएको छ ।
यता तालाबन्दी पश्चात बिश्वविद्यालयका पठन–पाठन ठप्प भएको छ भने विश्वविद्यालयका प्रशासनिक कामकाज अवरुद्ध भएको छ । हाल विश्वविद्यालय रामानन्द चोक स्थित भाडाको घरमा सञ्चालन गरिदै आएको छ ।
यो विषयमा आफ्नो प्रतिक्रिया दिनुहोस् !