लोक समाचारदाता
जनकपुरधाम, माघ १३ गते ।
प्रदेश २ मा सरकार परिवर्तनको चर्चा परिचर्चा भइरहेको बेलामा मुख्यमन्त्री लालबाबु राउतले कुनैपनि हालतमा सरकार परिवर्तन नहुने दाबी गरेका छन ।
नेपाल इन्जिनीयर्स एशोसिएन प्रदेश २ को प्रथम साधारण सभा कार्यक्रमलाई सम्बोधन गर्दै मुख्यमन्त्री राउतले संघीयता नरुचाउनेहरुले सरकार परिवर्तन जस्ता हल्ला फैलाएको आरोप लगाए ।
उनले भने संघीयताको प्रमुख केन्द्र बिन्दु नै प्रदेश २ हो, संघीयता नरुचाउने दलहरुले सरकार परिवर्तन जस्ता गलत हल्ला फैलाएको हो । जनताले म्यान्डेट दिएर पाँच वर्षका लागि बनाएको प्रदेश २ को सरकार हो यसमा कसैले शंका उपशंका गर्दा निराधार नै हुन्छ ।
मुख्यमन्त्री राउतले भने अहिले यो संक्रमणकालिन अवस्था हो, यसमा प्रतिगमनकारी तत्वहरुले सल्बगाउने चलखेल गर्ने खालका हुन्छन, मुलुक संघीयता र नयाँ सिस्टममा गइसकेपछि त्यो सिस्टमको विरुद्धमा लाग्नेहरुको सरकार परिवर्तन जस्ता विभिन्न किसिमका षडयन्त्र रहेको छ ।
उनले हिजोका दिन केही काम गर्न नसकेका संघीयता नरुचाउनेहरुले देश संघीयतामा गए भने देश टुक्रिन्छ धारणा राख्नेहरुले अहिले संघीयतामा धेरै कुरा व्यवस्थित भयो भने हामी नागिन्छौ भन्ने उद्देश्यले यस किसिमको प्रंपच गरेको भने ।
एक अर्को प्रसंगमा उनले भने उपभोक्ता समितिहरुको गत वर्षको बक्यौता रकम उपलब्ध गराउने व्यवस्था हामी मिलाई रहेका छौ । मुख्यमन्त्री राउतले बक्यौता रकम भुक्तानी गर्ने प्रावधान संघमा पनि नरहेकोले प्रदेशमा हामी नयाँ कानून बनाएर उपलब्ध गराउने तयारीमा लागेको जानकारी समेत दिए ।
मुख्मयन्त्री राउतले कर्मचारी अभावले गर्दा अन्तिम समयमा आएर बजेट खर्च गर्ने प्रक्रियाले गर्दा यस्तो समस्या उत्पन्न भएको हो, संसद वा सरकारबाट तत्काल समस्या समस्या समाधान नहुने भएकोले खरीद ऐन अध्ययन गरेर नियमावली तयार पारेर तिनीहरुको भुक्तानी चाँडै नै गरिने जानकारी समेत दिए ।
एशोसिएनका प्रदेश २ का अध्यक्ष नवलकिशोर यादवको अध्यक्षतामा सम्पन्न सो कार्यक्रममा प्रदेशभरिका इन्जिनीयर्स र पदाधिकारीहरुको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !