लोक समाचारदाता
जनकपुरधाम, माघ ९ गते ।
प्रदेश २ मा राष्ट्रिय सभा सदस्यको ४ सिटका लागि मतदान मुख्यमन्त्री लालबाबु राउतबाट बिहान १० बजेदेखि शुरु भएको छ ।
प्रदेश दुईको अस्थायी राजधानी जनकपुरधाम स्थित महेन्द्र नारायण निधि मिथिला सांस्कृतिक भवनमा निर्वाचन कार्य भइरहेको छ । प्रदेश सभा सदस्य र स्थानीय तह प्रमुख तथा उपप्रमुख मतदाता रहेका छन ।
शान्तिपूर्ण वातावरणमा निर्वाचन सम्पन्न गर्न सुरक्षा व्यवस्था कडा पारिएको छ । मतदान केन्द्र भन्दा करीब ५ मिटर मतदाता र संचारकर्मी बाहेक अन्य व्यक्ति तथा मोबाइल फोनलाई प्रवेश निषेध गरिएको । दुबै मतदान केन्द्रका लागि मतदान अधिकृत अतिरिक्त ८ जना कर्मचारी खटाइएको निर्वाचन अधिकृत राजुकुमार खतिवडाले जानकारी दिएका छन ।
मतदाता प्रदेशसभा सदस्य र पालिका प्रमुख, उपप्रमुखका लागि छुट्टा छुट्टै दुई मतदान केन्द्र राखिएको छ । प्रदेशसभा सदस्य १ सय ७ जना र स्थानीय तहका नगरप्रमुख, उपप्रमुख, गाउँपालिका अध्यक्ष र उपाध्यक्ष २ सय ७२ जना गरी कूल ३ सय ७९ जना मतदाता रहेको छ ।
प्रदेश दुईमा राष्ट्रियसभा सदस्यको चार सिटका लागि कांग्रेस, नेकपा, राजपा, समाजवादी सहितका ४ वटै दलको ८ जना उम्मेदवार चुनावी प्रतिष्पर्धामा रहेका छन । नेकपा र राजपा, कांग्रेस र समाजवादी छुट्टा छुट्टै गठबन्धन गरी आ आफ्ना उम्मेदवार प्रतिष्पर्धामा उतारेका छन ।
नेकपा राजपा गठबन्धनमा नेकपातर्फ प्रदेश सभा सदस्य ३२, स्थानीय तह ८३ गरी एक सय १५, राजपाको प्रदेश सभा सदस्य २५, स्थानीय तह ५४ गरी कुल ७९ गरी कुल १ सय ९४ मतदाता रहेको छ ।
त्यस्तै कांग्रेस समाजवादी गठबन्धनमा कांग्रेसतर्फ प्रदेश सभा सदस्य १९, स्थानीय तह ८१ गरी एक सय र समाजवादीतर्फ प्रदेश सभा सदस्य ३० र स्थानीय तहका ५२ गरी ८२ कुल १ सय ८२ मतदाता रहेको छ । स्वतन्त्रतर्फ प्रदेश सभा सदस्य १ र स्थानीय प्रमुख उपप्रमुख तर्फ गरी कुल ३ जना मतदाता रहेका छन ।
सो निर्वाचनमा अल्पसंख्यक समूह अन्तर्गत नेपाली काँगे्रसबाट भोला पजियार र राजपाबाट शेखरकुमार सिंह प्रतिस्पर्धामा रहेका छन् भने अन्य खुल्ला समूहतर्फ समाजवादीका अनिरुद्धकुमार सिंह र राजपाका मृगेन्द्रकुमार सिंह चुनावी मैदानमा छन ।
त्यस्तै, महिला समूह अन्तर्गत नेकपाबाट तुलसाकुमारी दाहाल र नेपाली काँग्रेसको तर्फबाट नगिना यादव चुनावी प्रतिस्पर्धामा छिन भने दलित तर्फ नेकपाका राधेश्याम पासवान र समाजवादी पार्टीका रामपृत पासवान प्रतिष्पर्धामा छन् ।
निर्वाचन दिउंसो ४ बजेसम्म चल्ने छ भने त्यस लगतै मतगणना कार्य शुरु हुने निर्वाचन अधिकृत खतिवडाले जानकारी दिएका छन ।
यो विषयमा आफ्नो प्रतिक्रिया दिनुहोस् !