लोक समाचारदाता
जनकपुरधाम, पुस २७ गते ।
टिपरले किचेर हत्या गरिएका धनुषा मिथिला नगरपालिका ५ श्रीपुरका ओमप्रकाश भन्ने दिलिपकुमार महतोको शव बिना मुचुलकाको उठाइएको आरोपमा इलाका प्रहरी कार्यालय, ढल्केबर धनुषाका प्रमुख प्रहरी निरीक्षक (इन्सपेक्टर) रामकुमार यादव जिल्ला तानिएका छन् ।
अवैध उत्खननका अभियन्ता दिलिपको हत्या घटनालाई ढाकछोप गर्न अभियुक्तहरुको मिलोमतो शव बिना मुचुलकाकै पोष्टमार्टमका लागि प्रादेशिक अस्पताल पठाएको भनी प्रहरी निरिक्षक यादवमाथि स्थानीयले लगाएको आरोपको अनुसन्धानका लागि जिल्लामा तानिएको बताइएको छ ।
शुक्रबार बिहान अवैध उत्खनन रोक्न गएका अभियन्ता दिलिपको क्रुरतापुर्वक हत्या गरिएको घटनालाई दुर्घटनामा परिणत गर्न टिपरले किचिएको थियो । घटनालाई दुर्घटनामा परिणत गर्न प्रहरी निरिक्षक यादवले चुरियामाई बालुवा प्रशोधन उद्योगका सञ्चालक विपीनकुमार महतो बिना मुचुलकाकै शव अस्पताल पठाएको कारण स्थानीय आक्रोशित भई प्रहरी प्रशासन विरुद्ध आन्दोलनमा उत्रेका थिए ।
विवादित बनेका यादवलाई आइतबार जिल्ला तानिएको हो । जिल्ला प्रहरी कार्यालय धनुषाका प्रमुख एसपी रमेश बस्नेतले भने विवादका कारण भन्दा पनि आन्तरिक कारणले जिल्ला ल्याइएको बताए ।
शनिवार पत्रकार सम्मेलनको क्रममा संचारकर्मीहरुको जिज्ञासामा प्रहरी उपरिक्षक बस्नेतले बिना मुचुलको शव किन उठाइयो भन्ने विवाद तिर हामी नजाउँ घटनाको अनुसन्धान भइरहेको छ, त्यसैका लागि हामीले प्रहरी निरिक्षक यादवलाई जिल्लामा बोलाएका छौं, अनुसन्धानपछि मात्रै केही भन्न सकिन्छ भनेका थिए ।
इन्स्पेक्टर यादवमाथि यसअघि मोरङको विराटनगरस्थित इलाका प्रहरी कार्यालय रानीको प्रमुख हँदा पनि तस्करसँग ‘सेटिङ’ मिलाएर सीमावर्ती क्षेत्रमा तस्करीलाई प्रोत्साहन गरेको भन्ने आरोप लागि सकेको छ ।
यो विषयमा आफ्नो प्रतिक्रिया दिनुहोस् !