लोक समाचारदाता
काठमाडौ, पुस १८ गते ।
करीब एक सातादेखि आफ्ना बक्यौताको मांग गर्दै काठमाडौमा भौतारिदै रहेका आन्दोलनरत उखु किसान र सरकारबीच वार्ता शुरु भएको छ ।
शुक्रवार बेलुकादेखि शुरु भएको सो वार्तामा सरकारको तर्फबाट उद्योग, वाणिज्य तथा आपूर्ति मन्त्री लेखराज भट्टले उखु किसानसँग छलफल गरिरहेका छन् ।
उखु उद्योगीले गत वर्षदेखि भुक्तानी नदिएको भन्दै किसानले काठमाडौं केन्द्रित आन्दोलन गर्न थालेको एक हप्तापछि सरकारले उनीहरुसँग वार्ता शुरु गरेको हो । यसअघि पुस १६ गते पनि वार्ता भएको थियो तर सो वार्तामा मन्त्री भट्टले मौखिक सहमति मात्र गरेका थिए ।
पिडीत आन्दोलनरत किसानहरुले मौखिक होइन लिखित सहमति भएमात्रै आन्दोलन स्थगित गर्ने भनी आन्दोलनलाई जारी राखेको क्रममा शुक्रवार पुनः वार्ताको लागि उनीहरुलाई बोलाइएको आन्दोलनका अगुवा राकेश मिश्रले बताए ।
संचारकर्मीहरु सँग कुरा गर्दै उद्योगमन्त्री भट्टले आगामी माघ ६ गतेभित्रै मिल मालिकहरुबाट उखु किसानहरुको भुक्तानी गराईने बारे लिखित सहमति गर्ने प्रतिबद्धता जनाएका छन् । मन्त्री भट्टले उखु किसानहरुको मागप्रति सरकार सुरुदेखि नै सकारात्मक र गम्भिर रहेको बताउँदै आगामी माघको पहिलो साताभित्रै सबै भुक्तानी दिलाउनेगरि लिखित रुपमै सहमति गर्ने जनाएको हो ।
यही पुसभित्र ८० प्रतिशत र बाँकी २० प्रतिशत माघको पहिलो सातासम्म भुक्तानी गराइसकिने यसअघिको वार्तामा मन्त्री भट्टले मौखिक सहमति गरेका थिए । उनले सरकारको तर्फबाट चिनी मालिकसँग किसानहरुको बाँकी भुक्तानी उठाइदिने म प्रतिबद्धता गर्दछु भनेका थिए ।
तर आन्दोलनरत किसानहरुले यस्ता मौखिक प्रतिबद्धता कयौ पटक गरिसकेको छ अब मौखिक सहमति होइन, लिखित सहमति संगै उद्योग मालिकलाई कारवाहीको मांग समेत अघि सारेका छन् ।
यो विषयमा आफ्नो प्रतिक्रिया दिनुहोस् !