लोक समाचारदाता
तुलसीपुर, पुस १७ गते ।
दाङमा धरौटी बुझाएर रिहा भएका नेत्रविक्रम चन्द ‘विप्लव’ समूहका नेताहरु पुनः अदालत परिसरैबाट पक्राउ परेको छ ।
बुधबार दाङ देउखुरी जिल्ला अदालतमा धरौटी बुझाएर रिहा हुन थालेका विप्लवका ४ जना नेता पुनः पक्राउ परेको हो । पक्राउ पर्नेहरुमा कुलबहादुर ओली, धनबहादुर बुढा, तिलक पुन र एकराज चौधरी रहेको छ ।
पक्राउ गर्ने क्रममा प्रहरी धरपकडका कारण केही बेर अदालत परिसरको अवस्था तनावग्रस्त समेत बनेको थियो । गत असोज ३० गते जिल्लाको राजपुर गाउँपालिकास्थित जंगलबाट पक्राउ गरिएको २१ जनामध्ये तिनीहरुलाई धरौटीमा रिहा गरिएको थियो ।
जिल्ला अदालतले ७ पुसमा पक्राउ परेका २१ जनालाई नै १५/१५ हजार धरौटीमा रिहा हुन आदेश दिएको थियो । तर प्रहरीले पुनः अदालत परिसरबाटै फरक मुद्दा लगाएर पक्राउ गर्ने तयारी गरेपछि उनीहरू पुस ७ गते धरौटी नबुझाएर कारागार चलान भएका थिए । अदालतको उक्त आदेश अनुसार चारैजनाका आफन्त धरौटी बुझाएर रिहा गराउने प्रक्रियामा थिए ।
पक्राउ परेका आफन्तजनहरुका अनुसार धरौटी बुझाइसकेपछि रिहाईका ती नेताहरु अदालतको दर्ता चलानी कक्षमा सही छाप गर्दै रहेका बेला प्रहरीले उनीहरूलाई पुनः पक्राउ गरियो ।
कानुन व्यवसायी निर्मल गौतमले अदालत परिसरबाट कसैलाई नियन्त्रणमा लिनु कार्य कानूनको बर्खिलाप मात्र नभई ज्यादति हो । उनले भने ‘अदालत परिसरभित्रबाटै कसैलाई पनि नियन्त्रणमा लिन पाइँदैन, तर प्रहरीले बुधबार जुन हर्कत देखायो यो ज्यादती भएको हो,’ ।
यसैबीच जिल्ला प्रशासन कार्यालयका प्रमुख जिल्ला अधिकारी गोविन्द रिजालले पनि अदालत परिसरबाट नियन्त्रणमा लिनु कार्य गलत हो, तर तिनीहरुलाई अदालत परिसर भित्रबाट होइन बाहिर नियन्त्रणमा लिइएको हो । के कति आरोपमा तिनीहरुलाई पुनः पक्राउ गरिएको हो भन्ने कुराको अनुसन्धान भइरहेको उनले बताए ।
यो विषयमा आफ्नो प्रतिक्रिया दिनुहोस् !