लोक समाचारदाता
जनकपुरधाम, पुस १३ गते ।
प्रहरी निरिक्षक सहित ३ जनाको ज्यान जाने गरी गत मंसिर २७ गते धनुषाको महेन्द्रनगरमा आर्थिक लेनदेनका कारण विप्लव समूहका खोले आढेका अपराधिक समूहले बम विस्फोट गराएको प्रहरीले खुलासा गरेको छ ।
प्रदेश २ का प्रहरी प्रमुख डिआइजी प्रद्युमनकुमार कार्कीले लोकपुकार सँग कुरा गर्दै भने बम विस्फोटमा संलग्नहरुको पहिचान भइसकेको छ, ८÷९ जना मध्ये ५ जनालाई नियन्त्रणमा लिई कर्तव्य ज्यान र विस्फोटको मुद्दा दायर गरी थप अनुसन्धान प्रक्रिया बढाइसकिएको छ ।
घटनामा बम बनाउने, राख्ने र पड्काउने सहितका मुख्य योजनाकार अझै फरार रहेको छ उनीहरुको खोजी कार्य तिव्र रुपमा जारी रहेको जानकारी दिदैं डिआई कार्कीले चन्दा नदिंदा रिसको झोंकमा बम विस्फोट गराइएको बताए ।
प्रहरी नियन्त्रणमा रहेका मुद्दा दायर भएका व्यक्तिहरु विप्लव समूहकै हुन भन्ने जिज्ञासामा उनले भने “ विगतको समयमा जनतान्त्रिक लगायतका विभिन्न भूमिगत समूहमा अपराधिक क्रियाकलाप गर्दै हाल विप्लव समूहको खोल ओढेर पैसाका लागि अपराधिक घटनाउने व्यक्तिहरु हुन । यो न त कसैको कार्यकर्ता न कुनै समूहको काम गर्ने मान्छे पैसाको लागि अपराधिक कार्य गर्ने व्यक्ति हो ।”
विप्लवको खोल ओढेर धम्काएर अवैध रुपमा पैसाका असुल्ने अपराधीक कार्य गर्ने समूहका व्यक्तिहरुले स्थानीय राजेश्वर साहलाई चन्दाको लागि पटक—पटक धम्काएको र नदिंदा वार्न गरेको हो , त्यसपछि पनि नमान्दा रिसको झोंकमा नियोजित रुपमा विस्फोट गराएको हालसम्मको अनुसन्धानमा खुलेको डिआई कार्कीको भनाई छ ।
पटक पटकको ताकेतापछि राजेश्वरको घर अगाडि टाइम राखियो, प्रहरी त्यहाँ पुग्दा नियोजित रुपमा विस्फोट गराएको हो भन्ने अनुसन्धानमा देखिएको छ, अझै थप अनुसन्धान जारी नै रहेको छ मुख्य योजनाकार देखिएकाहरु प्रक्राउ परेपछि मुद्दा अन्तिम टुंगोमा पुग्ने उनले बताउनु भयो ।
प्रदेश प्रहरी कार्यालय जनकपुर, जिल्ला प्रहरी कार्यालय धनुषा, केन्द्रिय अनुसन्धान ब्युरो र इलाका प्रहरी कार्यालयबाट गठित अनुसन्धान टोलीले संयुक्त रुपमा घटनाको अनुसन्धान गरिरहेको छ ।
मंसिर २७ गते राति भएको सो बम विस्फोटमा परी प्रहरी निरिक्षक अमिर दाहाल, घरमूली राजेश्वर साह, आनन्द साह सहित ३ जनाको मृत्यु भएको थियो भने एक प्रहरी जवान सहित ३ जना गम्भीर घाइते भएको थियो । हाल उनीहरु उपचारको क्रममा रहेका छन ।
यो विषयमा आफ्नो प्रतिक्रिया दिनुहोस् !