लोक समाचारदाता
राजविराज, पुस ३ गते ।।
सप्तरीको खडक नगरपालिका ७ कल्याणपुरस्थित नेपाली सेनाको सर्पदंश उपचार केन्द्र अहिले श्रोत साधनको आभावमा रेफर सेन्टरको रुपमा परिणत हुंदै गएको छ ।
सर्पदंश उपचार केन्द्रमा उपकरण र स्थान अभाव भएपछि उपचारमा दिनानुदिन समस्या उत्पन्न हुन थालेपछि प्रायः रेफर नै गरिदै आएको छ ।
उपचार कक्ष, फर्निचर, प्यासेन्ट मोनिटर, सक्सन मेसिन, अक्सोमिटर लगायतका उपकरणको अभाव रहेको प्राविधिक कठायतले बताए । आवश्यक उपकरण र उपचार कक्ष नहुँदा जटिल प्रकृतिका सर्पदंशका बिरामीको उपचारमा समस्या हुने गरेको केन्द्रका एक चिकित्कसले जानकारी दिए।
नेपाली सेनाको राजविराज स्थित भीम दल गणद्वारा १७ असार ०७६ देखि सर्पदंश उपचार केन्द्र संचालनमा ल्याइएको हो । खडक नगरपालिका ७ स्थित खानेपानी योजनाको जग्गा र भवनमा केन्द्र संचालित छ । वीरेन्द्र सैनिक अस्पतालबाट तालिमप्राप्त सेनाका प्राविधिकहरु चन्द्रबहादुर कठायत, दीपक कठायत र डम्बरध्वज चन्दले बिरामीको उपचार गर्दै आएका छन् ।
सेनाको अन्य जनशक्ति बस्न र उपचार गर्न कोठा अभाव छ । सर्पदशंको उपचारका लागि दुईवटा कोठामा तीनवटा बेड राखिएको छ । तर, उपचारका लागि कोठा र फर्निचर पर्याप्त नभएको प्राविधिकहरु बताउँछन् । वर्षातको समयमा बिरामीको चाप बढेपछि कुर्सीमा उपचार गर्ने गरिएको छ ।
केन्द्र संचालनका क्रममा खडक नगरपालिका कार्यालयले ३ लाख रुपैयाँ उपलब्ध गराएपनि त्यसपछि कतैबाट सहयोग नपाएको संचालन तथा व्यवस्थापन समितिका संयोजक मो. उसमान मियाँले बताए ।
उपचार सेवा संचालनमा आएपछि ५ महिनाको अवधिमा सर्पदंशका बिरामी मध्ये जम्मा ७ जना विष लागेका बिरामी भर्ना भएका थिए जसमा ४ जनालाई रेफर नै गर्नु परेको छ ।
केन्द्रमा असार १७ गतेपछि २ सय ११ जना सर्पदंशका बिरामीको उपचार गरिएको छ । जसमा महिलाको संख्या अधिक छ । २ सय ११ मध्ये ८७ जना पुरुष र १ सय २४ जना महिला रहेको केन्द्रले जनाएको छ । प्रायजसो १५ देखि ४५ वर्ष उमेर समूहका व्यक्ति सर्पदंशमा पर्ने गरेका छन् ।
यो विषयमा आफ्नो प्रतिक्रिया दिनुहोस् !