दोषीलाई तत्काल पक्राउ गर्न अनुसन्धान टोली गठन र समीक्षा
लोक समाचारदाता
जनकपुरधाम, मंसिर २८ गते ।
धनुषाको क्षिरेश्वरनाथ नगरपालिका ५ महेन्द्रनगरमा प्रहरी निरिक्षक सहित ३ जनाको ज्यान जाने गरी भएको बम विस्फोट घटनामा ३ जनालाई प्रहरीले पक्राउ गरेको छ ।
जिप्रका धनुषाले अनुसन्धानको क्रममा दुई महिला र एक पुरुष गरी तीनजनालाई पक्राउ गरेको हो । पक्राउ परेका महिला हंसपुर नगरपालिका २ निवासी ललितादेवी महरा र सीता देवी महरा विप्लव समूहसँग आबद्ध रहेकोले घटनामा विप्लव समूहकै संलग्ना हुन सक्ने आशंका गरिदै आएको प्रहरी श्रोतको भनाई छ ।
श्रोतका अनसार घटनामा मृतक राजेश्वर साह ऋणमा पैसा लगानी गर्थे र विप्लव समूहका केही कार्यकर्ताहरुलाई समेत ऋण दिएको थियो । सोही पैसा ताकेता गर्दा उनको घरमा बम झुण्डयाएको हुन सक्ने अनुमान गरिदैछ ।
अनुसन्धान टोली गठन
जिल्ला प्रहरी कार्यालय धनुषाले घटनाको वृहत अनुसन्धानका लागि प्रहरी निरिक्षक उमाशंकर साहको नेतृत्वमा ७ सदस्यीय अनुसन्धान टोली पनि गरिएको जिल्ला प्रहरी कार्यालय धनुषाका प्रहरी नायब उपरिक्षक रामेश्वर कार्कीले जानकारी दिनु भएको छ ।
प्रहरी उपरिक्षक शेखर खनाल विदामा भएको कारण प्रहरी नायब उपरिक्षक कार्की आफै घटनास्थलमा अनुसन्धानका समेत खटेका छन् । अपराधीलाई तत्काल पक्राउ गरेर घटनालाई निष्कर्णमा पुरयाउन तीनवटै सुरक्षा निकायले अनुसन्धानमा खटेका छन् ।
अपराधी समात्न सुरक्षा बैठक
यसैबीच घटना पश्चात शनिवार बिहान सुरक्षा समन्वयको बसेको बैठकबाट घटनामा संलग्न अपराधीलाई तत्काल पक्राउ गर्ने निर्णय गरिएको छ ।
बैठकमा गएराति भएको घटना र जिल्लाको सुरक्षा अवस्था बारे समीक्षा गरिएको कुरा प्रमुख जिल्ला अधिकारी प्रदीपराज कणेलले जानकारी दिनु भएको छ ।
समीक्षामा प्रहरी निकायबाट भएका कमीकमजोरी बारे वृहत रुपमा छलफल गर्नुका साथै आगामी दिनमा यस्ता घटना नदोहरियोस भन्ने सुरक्षा समितिलाई सचेत हुन भनिएको छ । बैठकमा जिल्लाको सुरक्षा व्यवस्था सुदृढ पार्न सुरक्षा समितिमा रहेका तीनवटै निकायबीचको समन्वय बढाइने निर्णय समेत गरिएको प्रजिअ कणेलले बताउनु भएको छ ।
गएराति भएको सो बम विस्फोट घटनामा परी प्रहरी निरिक्षक सहित अमिर दाहाल सहित ३ जनाको मृत्यु भएको थियो । इलाका प्रहरी कार्यालय नजिकै रहेको राजेश्वर साहको घरको शौचालयमा फेला परेको बम हो होइन भन्ने यकिन गर्ने क्रममा प्रहरी निरिक्षक दाहालको मृत्यु भएको थियो ।
सो घटनामा घरधनी राजेश्वर साह र उनका छोरा आनन्द साहको घटना स्थलमै मृत्यु भएको थियो भने गम्भीर घाइते भएका प्रहरी निरिक्षक दाहालको उपचारको क्रममा धरान स्थित विपी कोइराला प्रतिष्ठानमा बिहान ७ बजे मृत्यु भएको थियो ।
सो घटनामा परी प्रहरी जवान रिजन महतो, राजेश्वरका छोरा प्रकाश साह र छोरी अञ्जली साह घाइते भएको थियो । उनीहरुको उपचार धरानमै भइरहेको छ ।
औषधि व्यवसायी समेत रहेका राजेश्वर ऋणमा पैसा दिने साहुकारको काम समेत गर्दै आएको थियो, पारिवारिक श्रोतका अनुसार हालसम्म उनले ३० लाख रुपैया ऋणमा लगाएको छ ।
यो विषयमा आफ्नो प्रतिक्रिया दिनुहोस् !