गढीमाईबाट आइरहेको पिकअप दुर्घटना, २ को मृत्यु

लोक समाचारदाता
जनकपुरधाम, मंसिर १८ गते ।
गढीमाई मेलाबाट आइरहेको एक यात्रुवाहक पिकअप महोत्तरीको बर्दिबासमा दुर्घटना हुँदा २ जनाको मृत्यु भएको छ भने १५ जना घाइते भएको छ ।
मृत्यु हुनेहरुमा धनुषाधाम घर भएका सकुन्तला देवी महतो र भारत जयनगर घर भएका तनिया देवि महतो रहेकी छन् । घाइते मध्ये ४ जनाको अवस्था गम्भीर रहेको महोत्तरी प्रहरीले जनाएको छ ।
मंगलबार राति बाराको गढीमाई मेलाबाट फर्किदै गरेको २ च ८८५५ नम्बरको यात्रु बेकेको पिकअप अनियन्त्रित भई पूर्व पश्चिम राजमार्ग अन्तर्गत बर्दिवास नगरपालिको लक्ष्मिनीया स्थित सडकबाट तल खसेर दुर्घटना भएको इलाका प्रहरी कार्यालय बर्दिबासले जनाएको छ ।
राति २ बजे फर्किदै गरेको उक्त पिकअप विपरीत दिशाबाट आउँदै गरेको एक ट्रकले हेडलाईट डिम नगर्दा दुर्घटना भएको सडकबाट तल खसेर दुर्घटना भएको प्रहरीको भनाई छ ।
घाइतेहरुको उपचार बर्दिवास स्थित शुभस्वस्तिक अस्पताल उपचार भैरहेको छ भने ती मध्ये गम्भीर घाइते भएका ४ जनालाई थप उपचारको लागी विपी कोइराला विज्ञान प्रतिष्ठान धरान रेफर गरिएको छ ।
दुर्घटना भएका पिकअप र चालकलाई नियन्त्रणमा लिएर थप अनुसन्धान गरिरहेको ईलाका प्रहरी कार्यालय बर्दिबासले जनाएको छ ।