लोक समाचारदाता
जनकपुरधाम, कातिक १९ गते ।
प्रदेश २ मा सरकारदेखि विभिन्न निकायमा भ्रष्टाचारै भ्रष्टाचार चर्चा भइरहेकै बेला स्वास्थ्य निर्देशनालयमा समेत औषधि र उपकरण खरिदमा अनियमितता भएको रहस्य बाहिरिएको छ ।
समाजिक विकास मन्त्रालय र प्रदेश निर्देशनालयको सेटिंगमा औषधि तथा उपकरण खरिदमा ४ करोड रुपैयाँ भन्दा बढी भ्रष्टाचार भएको टुडेपाटीमा प्रकाशित समाचारमा भनिएको छ ।
समाचारमा भनिएको छ आर्थिक वर्ष २०७५।०७६ मा आर्थिक मसान्तको अन्तमा मन्त्रालय र प्रदेश निर्देशनालयको सेटिंगमा सार्वजनिक खरिद ऐन विपरीत टेन्डर तथा कोटेशनमा विभिन्न फार्म तथा फार्मेसीबाट औषधि तथा उपकरण खरिद गरेको छ ।
सो सामाग्री मध्ये काठमाडौ स्थित गौतम फार्मबाट मात्र १० करोडको सर्जिकल समान तथा निःशुल्क औषधि खरिद गरिएको छ । त्यस भित्र निःशुल्क औषधि र केहि उपकरण समेत रहेको छ । तर कार्यालयले भने यस विषयमा विस्तृत जानकारी लिन खोज्दा दिन मानेको छैन । कार्यालयले वितरण गरेको औषधिको जानकारी दिएपनि स्टोरमा कति औषधि छ भन्ने कुराको जानकारी समेत दिन मानेको छैन ।
त्यस्तै नाम नखुलाइएको फार्म तथा फार्मेसीबाट २ करोड २५ लाखमा ५ वटा उच्च गुणस्तरीय अल्ट्रासाण्ड मेसिन लगायतो समान खरिद गरेको छ । गौतम फार्मबाट खरिद गरेको औषधि तथा उपकरणमा भने झण्डै ४ करोड रुपैयाँको कमिसन प्रदेश निर्देशनालय र समाजिक विकास मन्त्रालयका मन्त्रीदेखि कर्मचारीसम्मले लिएको श्रोतको दावी छ ।
श्रोतका अनुसार औषधि आधा रकमको मात्र खरिद गरेपनि बिल भने पुरै १० करोडको बनाएको छ । नाम उल्लेख गर्ने शर्तमा विभागकै एक कर्मचारीले भने ‘औषधि, उपकरण खरिद प्रकरणको राम्ररी छानविन भए समाजिक विकास मन्त्री नवलकिशोर साह, मन्त्रालयका उच्चपदस्थ कर्मचारी, प्रदेश निर्देशनालयका निर्देशक डा.प्रमोद यादव, स्वास्थ्य अधिकृत विजय झा, लेखापाल गोपाल ओली लगायत व्यक्ति फंस्ने निश्चित छ ।
प्रदेश निर्देशनालयले कहाँ कहाँबाट कुन औषधि, उपकरण खरिद गरेको भन्ने कुराको सूचना पटक पटक मांग गर्दा सार्वजनिक गर्न मानेका छैनन । भ्रष्टाचार लुकाउन समाजिक विकास मन्त्रालय र प्रदेश निर्देशनालयका कर्मचारीहरु जो कोही सूचना मांग्दा जाँदा आलटाल गर्दै आएका छन् ।
यता प्रदेश निर्देशनालयका निर्देशक डा.प्रमोद यादवले औषधि तथा उपकरण खरिदमा समान्य त्रुटि भएपनि कुनै प्रकारको भ्रष्टाचार भएको छैन दाबी गर्दै आएका छन् ।
आर्थिक वर्षका अन्त्यमा मन्त्रालयले बजेट दिएको कारण बजेट फ्रिज नहोस अभिप्रायले हतार हतार खरिद गरिएको कारण केही सामान्य त्रुटि हुन गएको निर्देशक डा. यादवको भनाई छ । उनले भने यदि औषधि खरिद नभएको भए प्रदेश भित्रको स्वास्थ्यचौकीहरुमा निःशुल्क औषधिको हाहाकार हुने थियो र डेंगु रोग नियन्त्रणमा समस्या आउन सक्ने थियो । तर जे भएपनि समयमै औषधि र किटले प्रदेशमा डेंगु रोग नियन्त्रण गर्न ठूलो भूमिका खेलेको छ ।
तर औषधि लगायतका सामाग्री खरीदको सूचना मांग गर्दा सार्वजनिक नगरिएको कुरामा उनले भने कर्मचारीलाई फुर्सत हुन नसकेको कारण नदिएको होला ।
यो विषयमा आफ्नो प्रतिक्रिया दिनुहोस् !