लोक समाचारदाता
जनकपुरधाम, असोज २८ गते ।
सूचना माग्न गएका युवकलाई जनकपुरधाम उपमहानगरपालिका मेयर लालकिशोर साहकै अगाडि वडाध्यक्षले कुटेको घटनालाई छानबीन गर्न समाचार प्रकाशनमा आएको अर्को दिन नै राष्ट्रिय सूचना आयोगले पत्राचार गरेको छ ।
सोमवार विभिन्न संचार माध्यमले सूचना मांग्ने युवक मेयरकै अगाडि वडाध्यक्षबाट कुटिएको भन्ने समाचार प्रकाशन भएपछि एकदिन नबित्दै आयोगले घटनाको छानबीन गर्न जिल्ला प्रशासन कार्यालय धनुषालाई पत्राचार गरेको छ ।
आयोगले पत्रमा धनुषाका प्रमुख जिल्ला अधिकारीको नाममा पत्र पठाउँदै घटनालाई छानविन गरी दोषीमाथि कानुन बमोजिम कार्वाही र माग गरे बमोजिमको सूचना उपलब्ध गराइदिन सहजीकरण गर्न भनेको हो ।
गत असोज १३ गते उपमहानगरपालिका वडा नंं १८ का स्थानीय तपेश्वर ठाकुर र रामबाबु मण्डल सूचना माग्न कार्यालय पुगेको बेला मेयर लालकिशोर साहकै अगाडि वडाध्यक्ष रामशंकर पासवानले तथानाम गालीगलौजसंगै कुटपीट गरेका थिए ।
वडाध्यक्ष पासावानले गाली बेइज्जती गर्दै मण्डलमाथि हातपात गरेपनि मेयर साह मुकदर्शक भएको उनीहरुको आरोप छ । आफुहरुमाथि भएको दुव्र्यवहार तथा कुटपीट उपमहानगरपालिकाको मेयरको कार्यकक्षमा जडान भएको सीसीटीभी फुटेजमा रहेको पीडितद्वयको आरोप रहेको छ ।
दुव्र्यवहार तथा कुटपीट घटनामा संलग्न वडा नं. १८ का वडाध्यक्ष रामशंकर पासवान, मेयर लालकिशोर साह र नगरपालिकाका योजना प्रमुख ईन्जिनियर विरेन्द्र कुमार यादवमाथि कार्वाहीको माग गर्दै पीडित द्वयले जिल्ला प्रशासन कार्यालय धनुषा र जिल्ला प्रहरी कार्यालय धनुषामा निवेदन दिएपछि घटना सार्वजनिक भएको हो ।
नगरपालिका जस्तो सार्वजनिक स्थल र सार्वजनिक व्यक्तिहरुबाट आफ्नो सुसूचित हुने मौलिक अधिकारको हनन र मानवअधिकारको गम्भीर उलंघन भएको भन्दै पीडित द्वय मण्डल र ठाकुरले मंगलबार राष्ट्रिय सूचना आयोग कोटेश्वर काठमाडौं र राष्ट्रिय मानव अधिकार आयोग क्षेत्रिय कार्यालय जनकपुरमा संलग्न दोषीहरुमाथि कार्वाहको लागि पहल गरिदिन निवेदन दिएका थिए ।
सोहि निवेदन उपर सुनुवाई गर्दै राष्ट्रिय सूचना आयोगले मंगलबार नै एक पत्र लेखेर धनुषाका प्रमुख जिल्ला अधिकारीलाई घटनाको विषयमा सत्यतथ्य छानविन गरी कार्वाही प्रक्रिया अघि बढाउन र माग बमोजिमको सूचना उपलब्ध गराउन सहायोग गर्न भनेको छ ।
यो विषयमा आफ्नो प्रतिक्रिया दिनुहोस् !