लोक समाचारदाता
जनकपुरधाम, असोज २८ गते ।
प्रतिनिधि सभा सांसद प्रमोद साह पक्राउ परेपछि राष्ट्रिय जनता पार्टी नेपाल सरकार विरुद्ध आक्रोशित भएका छन् ।
राजपा नेपालका संघीय र प्रदेशका मन्त्रीदेखि सांसद तथा नेता कार्यकर्ताहरुले अन्यायको विरुद्ध आवाज उठाउनेलाई पक्राउ गर्नु सरकारको चरम गलती रहेको भन्दै उनलाई तत्काल रिहा नगरिए कडा आन्दोलन गर्ने चेतावनी दिएका छन् ।
राजपा नेपालका सांसद एवं अध्यक्ष मण्डलका सदस्य राजेन्द्र महतोले अन्याय विरुद्ध आवाज उठाउने र टेबुल ठटाउनेलाई पक्राउ गर्ने क्रियाकलाप सरकारको निरंकुश प्रवृति रहेको यस विरुद्ध आन्दोलनको कडा कदम चाल्ने चेतावनी दिएका छन् ।
एक संचार माध्यमसँग कुरा गर्दै उनले भने सांसद साहलाई तत्काल रिहा नगरे कडा कदम चाल्नेछु र विरोधको कार्यक्रम अगाडि बढाउनेछु । साथै उनले विपक्षीप्रति वर्तमान सरकार नकारात्मक बन्दै गएकोले सचेत हुनुपर्ने बेला आएको महतोले बताए ।
यसैबीच प्रदेश सभा सदस्य परमेश्वर साहले लोकपुकार सँग कुरा गर्दै अन्याय र बुद्ध एअरको मनपरी विरुद्ध आवाज उठाउने मधेशी सांसदलाई पक्राउ गर्नु वर्तमान सरकारले ज्यादती गरेको बताएका छन । उनले भने यदि साहलाई तत्काल बिना शर्त रिहाई नगरे पार्टीको बैठक बसी चांडै नै आन्दोलनको घोषणा गर्नेछु ।
साथै उनले आन्दोलनको आगामी कदम नेपाल सरकार मात्रै होइन बुद्ध एअर कम्पनीको लापरवाही विरुद्धको पनि हुनेछ भने ।
प्रदेश सभा सदस्य साहले आजकै मितिदेखि बुद्ध एअरको मनपरी विरुद्ध सो कम्पनीको विमान यहाँबाट लगियोस र ती विमानबाट कुनैपनि मधेशी नेता वा जनता यात्रा नगरोस भन्ने अपिल गरिसकेको भने ।
आरोपित सांसद साहलाई काठमाडौबाट जनकपुर ल्याइएको बेला दर्जनौको संख्यामा उपस्थित भएका राजपाका नेता कार्यकर्ताहरुले विमान स्थलमै सरकार र बुद्ध एअर विरुद्ध नाराबाजी गर्दै प्रदर्शन गरेका थिए ।
सांसद साहलाई विमान स्थलबाट जिल्ला प्रहरी कार्यालय धनुषामा लगेको केही बेरपछि नै राजपा नेता कार्यकर्ताहरु जनकपुरको जनक चौक लगायतका विभिन्न चौक चौराहामा टायर बालेर नाराबाजी गर्दै विरोध प्रदर्शन गरेका छन ।
विमान ढिलो भएको कारण बुद्ध एअरको काउण्टरमा तोडफोड र कर्मचारीलाई हातपात गरेको आरोपमा नागरिक उड्यान प्राद्यिकरणले उजुरीको दिएपछि उनलाई ओखलढुंगा जान लागेको बेला काठमाडौ विमान स्थलबाट मंगलवार बिहान करीब १२ बजेतिर पक्राउ गरिएको थियो ।
सोमवार बिहान ११ः४० बजेको बुद्ध एअरको विमान ढिलो भएको कारण किड्नीका बिरामी नेपाली कांग्रेसका नेता दिलिप सहगल छटपटाई रहेको देखेर सांसद साह उनको पीडा सहन नसकी आक्रोशमा आई बुद्ध एअरको काउण्टरमा तोडफोड गरेका थिए । तोडफोड घटनापछि काठमाडौ जान लागेका सांसद साहलाई बुद्ध एअरका कर्मचारी रोक्न खोजेपछि दुवै पक्षबीच हातहाल समेत भएको थियो ।
यो विषयमा आफ्नो प्रतिक्रिया दिनुहोस् !