हुलाकी राजमार्ग र पुननिर्माणका लागि भारतले गरे अर्बौको सहयोग

लोक सम्वाददाता
काठमाडौं, भदौ ४ गते ।
हुलाकी राजमार्ग र हुलाकी राजमार्ग निर्माणका लागि भारतले नेपाल सरकारलाई अर्बौ रुपैया सहयोग गरेको छ ।
नेपाल भारत संयुक्त आयोगको पाँचौ बैठकमा सहयोग स्वरुप भारतले हुलाकी राजमार्ग निर्माणका लागि भारतीय रुपैयाँ ८० करोड भन्दा बढी र भूकम्पपछिको गोरखा र नुवाकोटमा घर पुनर्निर्माणका लागि २ अर्ब ४५ करोड रुपैयाँ बराबरको चेक हस्तान्तरण गरेको छ ।
बुधबार काठमाडौंको होटल याक एण्ड यतीमा शुरु भएको बैठकमा भारतले हुलाकी राजमार्ग निर्माणका लागि र भूकम्पपछिको पुननिर्माणका लागि भारतीय राजदूत मञ्जिव सिंह पुरीले सो रकम बराबरको चेक हस्तन्तरण गरेका हुन् ।
विहीबारसम्म चल्ने संयुक्त आयोगको बैठकमा राजनीतिक र सीमा सुरक्षा, सञ्चार सञ्जाल र आर्थिक समृद्धि, व्यापार र पारवहन, ऊर्जा र जलस्रोत लगायतका महत्वपूर्ण विषयमा छलफल हुने जनाइएको छ ।
उक्त चेक दुई देशका परराष्ट्र मन्त्रीको उपस्थितिमा नेपालका लागि भारतीय राजदूत मञ्जिभसिंह पुरीले राष्ट्रिय पुनर्निर्माण प्राधिकरणका सिइओ सुशील ज्ञवालीलाई हस्तान्तरण गरेका हुन्।
भारतले पुनर्निर्माणका लागि २५ करोड अमेरिकी डलर आर्थिक सहायता र ७५ करोड अमेरिकी डलर सहुलियतपूर्ण ऋण दिने घोषणा गरेको थियो ।
आयोग गठन भएको ३२ वर्षपछि पाँचौँ बैठकलाई स्वदेशी विदेशी कूटनीतिक क्षेत्रले विशेष महत्त्वका साथ लिएका छन् । परराष्ट्रमन्त्री प्रदीपकुमार ज्ञवाली र भारतीय विदेशमन्त्री जयशङ्करले संयुक्त अध्यक्षता गर्दै बैठक शुरु भएको हो ।
यसअघि चौथो बैठक सन् २०१६ मा नयाँदिल्लीमा बसेको थियो ।