पक्राउ पुर्जी जारीपछि सहयोगी विकास बैंकका संचालक दिपु फरार

लोक सम्वाददाता
जनकपुरधाम, साउन १४ गते ।
जालसाजी ठगी गरेको आरोपमा जनकपुरधाम स्थित सहयोगी विकास बैंक लिमिटेड संचालक समितिका सदस्य दिपेन्द्र कुमार यादव (दिपु) विरुद्ध पक्राउ पुर्जी जारी गरिएको छ ।
यादवले जनकपुरधाम १० का लालबाबु रौनियारको धितो राखिएको जग्गा जालसाजी तथा ठगी गरी विक्रि गरेको अभियोगमा जिल्ला अदालत धनुषाले पक्राउ पुर्जी जारी गरेको हो ।
रौनियारले लामो समयसम्म पनि आफ्नो जग्गा फिर्ता नपाएपछि जग्गा दिलाइदिनका लागि अदालतमा मुद्दा दायर गरेपछि अदालतले जालसाजी तथा ठगी गरेको अभियोगमा अभियूक्त दिपेन्द्र कुमार यादव दिपुको नाममा पक्राउ गरी हाजिर गराउन भनी पक्राउ पुर्जी जारी गरेको बुझिएको छ ।
करिब ८ वर्षअघि रौनियारले महोत्तरीको बर्दिवास स्थित ५ कट्ठा जग्गा व्यक्तिगतरुपमा यादव कहाँ धितो राखि ५० लाख रुपैयाँ ऋण लिएका थिए । केहि वर्ष भित्रै सो ऋण वापत यादवलाई ७३ लाख रुपैया चुक्ता गरेपनि जग्गा फिर्ता पाएन । जग्गा फिर्ता गर्न पटक पटक आग्रह गर्दा पनि जग्गा नपाएपछि पिडीतले फिर्ता गराई दिन मांग गर्दै करीब ६ अघि जिल्ला अदालत धनुषामा रौनियारले मुद्दा दायर गरेको थियो ।
पीडित रौनियारको बर्दिवास स्थित रहेको ५ कठ्ठा जग्गा २ करोड ७० लाख रुपैयाँमा यादवले बेचेको श्रोतको दाबी छ । आफ्नो जग्गा विक्री भइसकेको थाहा पाए लगतै रौनियारले जग्गा फिर्ता गर्न आग्रह गर्दा केही अझै समय लाग्ने भन्दै यादवले बेवस्ता गर्दै आएको थियो ।
यता प्रहरीले संचालक यादवको घरमा छापा मारेपनि उनलाई पक्राउ गर्न सकेको छैन । पक्राउ पुर्जी जारी भए लगतै अभियूक्त यादव फरार भएको बुझिएको छ ।