लोक सम्वाददाता
जनकपुरधाम, साउन १३ गते ।
प्रत्येक वर्ष झै यस वर्षपनि साउने सोमवारीमा धनुषाको लक्ष्मिनियाँ गाउँपालिका वडा नं. १ सोहनी स्थित सोमेश्वरनाथ महादेव मन्दिरमा भगवान भोलेनाथलाई जल अर्पण एवं पुजापाठ गर्न हजारौको संख्यामा श्रद्धालु भक्तजनहरुको घुइचो लाग्ने गरेको छ ।
ग्रामीण क्षेत्रमा सो मन्दिर भएपनि निकै कम समयमा प्रख्यात भएको कारण प्रत्येक वर्ष सोमेश्वरनाथ महादेवलाई जल अर्पण एवं पुजापाठ गर्नेहरुको भीड बढदै गएको छ । मन्दिरमा साउने सोमवारीका साथ साथ आस्था एवं विश्वास जोडिएका व्यक्तिहरु अन्य दिनपनि सो मन्दिरमा आउने गरेको छ । भगवान महादेवप्रति आस्था राख्ने श्रद्धालुहरुको जलअर्पण एवं पुजापाठ गर्न मन्दिर प्रांगणमा दिनभरि लाईन देखिएको कुरा समाजवादी पार्टीका नेता स्थानीय हरिनारायण यादवले बताएका छन् ।
स्थानीयको सहयोगमा निर्मित सो मन्दिरमा प्रत्येक वर्ष साउन महिनाभरि र महाशिवरात्रीमा ठूलो मेला लाग्ने गरेको छ भने साउनभरि प्रत्येक सोमवार शिवपुराण वाचन, भोलेबाबाको नचारी, भजन आरती र भगवान शिवको महिमा बारे प्रवचन वाचन हुंदै आएको छ । आज बाबा श्री अंगदजी महाराजद्वारा प्रवचन वाचन गरिएको छ । सोमेश्वरनाथ महादेव मन्दिरमा जलअर्पण, पुजापाठ र दर्शन गरे मनोवाञ्छित फल पुरा हुने जनविश्वास रहेको छ ।
विसविटी आज सोमवार कमलाको उतराहिनीबाट सयौको संख्यामा बाजागाजाका साथ कवारियाहरु जल भरेर सो सोमेश्वर महादेवमा जलअर्पण गरेका छन् । पछिल्लो सोमवार विसविटीबाट जल भरेर सोमेश्वरनाथ महादेवलाई जल अर्पण गरिएको कुरा मन्दिर स्थापनामा समेत अहम भूमिका निर्वाह गरेका नेता यादवले बताए । अघिल्लो सोमवार अत्यधिक संख्यामा कवरियाहरुले बाजागाजाका साथ जल भरी ल्याई अर्पण गर्ने बताइएको छ ।
अहिले सो मन्दिरको रेखदेख र भगवानको पुजापाठ सोमेश्वरनाथ महादेव मन्दिर संरक्षण समितिका अध्यक्ष भोला यादवले गर्दै आएको छ । मन्दिर पुर्ण निर्माण नभएपनि सो क्षेत्रलाई निकै नै रमणीय बनाइएको छ । मन्दिरको छेउमै पवित्र सरोवर छन भने चारैतिर फुलको बगैचा र विभिन्न रुखहरु लगाइएको छ । मन्दिरमा दैनिक पुजा आरती बिहान र बेलुका गाउँलेहरुको उपस्थितिमा हुन्छ । तर महाशिवरात्री र साउने सोमवारीमा भारत नेपालका विभिन्न स्थानबाट श्रद्धालु भक्तजनहरु आउने गरेको छ ।
यो विषयमा आफ्नो प्रतिक्रिया दिनुहोस् !