एक हप्तापछि संघीय सरकारले बाढी क्षेत्रको गरे अनुगमन

लोक सम्वाददाता
जनकपुरधाम, साउन १ गते ।
तराई मधेशका प्रमुख केन्द्र प्रदेश २ मा बाढी आएको एक हप्तापछि संघीय सरकारका मन्त्रिपरिषदका टोली बाढीको अनुगमन र अवस्था बुझ्न बाढी प्रभावित क्षेत्रमा आएका छन् ।
उपप्रधान तथा स्वास्थ्य मन्त्री उपेन्द्र यादवको नेतृत्वमा गृहमन्त्री रामबहादुर थापा बादल, उर्जा तथा सिचाई मन्त्री वर्षमान पुन भौतिक पुर्वाधार विकास मन्त्री रघुवीर महासेठ सहितका टोलीले प्रदेशका ८ वटै जिल्लाको बाढी प्रभावित क्षेत्रको अनुगमन पश्चात वर्तमान अवस्था बारे प्रदेश सरकारसँग जानकारी लिएका छन् ।
प्रदेशका राजधानी जनकपुरधाम विमान स्थलमा संचारकर्मीहरुसंग कुरा गर्दै स्वास्थ्य मन्त्री स्वास्थ्य मन्त्री उपेन्द्र यादवले चुरे संरक्षणको आभावका कारण प्रत्येक वर्ष प्रदेश २ सहित तराई मधेशमा बाढी आइरहेको बताए ।
उनले चूरे संरक्षण नभएसम्म यस्तै त्राहिमामको अवस्था विद्यमान रहने बताउंदै सबभन्दा पहिले चूरेलाई जोगाउनु सरकारको प्रमुख काम रहेको भने । चूरेमा बस्ति बसाउनु तथा सडक निर्माणमा पूर्ण प्रतिबन्ध गर्नु नै बाढीको स्थायी समाधान रहेको चर्चा समेत गरे ।
सो टोलीमा सहभागी गृहमन्त्री रामबहादुर थापा बादलले प्रदेश २ का प्रमुख सचिव दिपक सुवेदीसंग बाढीको प्रादेशिक अवस्था बुझदै बाढीबाट भएको क्षतिको यकिन बिवरण पछि सरकारले राहत तथा पुनःस्थापनामा सहयोग गर्न निर्देशन दिए ।
मन्त्री बादलले चूरे बिनाशका कारण तराई मरुभुमि हुने अवस्थामा पुगेको बताउंदै तराई मधेशको समस्यालाई नीतिगत रुपमा सुधारका लागि सरकारले विपद् प्राधिकरणको थाल्नी गरिसकेको जानकारी दिए ।
राजपा अध्यक्ष मण्डलका संयोजक अनिल झाले गृहमन्त्रीको जवाफमा आपत्ति जनाउँदै भने राहतमा सरकारले राजनीति गरेको आरोप लगाए । उनले सरकारलाई पटक पटक तराई मधेशको बास्तविक बाढी पिडितलाई ख वर्ग र अवास्तविकलाई क वर्गको राहत वितरण गरेको आरोप समेत लगाए ।
त्यस्तै उर्जा जलश्रोत तथा सिचाई मन्त्री वर्षमान पुनले प्रदेश सरकारको बाढी बिफ्रिङ्गपछि बाढीले कमला, बकैया, बागमति सहितका नदीमा भएको क्षतिलाई यकिन गरेर तत्काल ममर्तमा रकम अभाव हुन नदिने प्रतिबद्धता जनाए ।
प्रदेशका मुख्यमन्त्री लालबाबु राउतले श्रोत साधनको आभावमा बाढी अति प्रभावित क्षेत्रमा अनुगमन गर्न नसकिएको जानकारी गराउंदै संघीय सरकारसंग निरिक्षणका लागि हेलिकप्टर उपलब्ध गराउन मांग गरे ।
ती टोलीले बाढी प्रभावित प्रदेश २ को रौतहट, सप्तरी, सर्लाही, महोत्तरी, धनुषा लगायतको अनुगमन गरेका छन् । उनीहरुसंग आएका संसदको विकास समितिका सभापति कल्याणी खड्का, नेकपा नेता तथा संघीय सांसद प्रभु साह, राजपा अध्यक्ष मण्डलका संयोजक अनिल झा, कृषि राज्यमन्त्री रामकुमारी चौधरी लगायतको टोली बाढीले पुर्याएको क्षति र राहत तथा उद्धार कार्यको अवलोकन गरेका छन् । ्