प्रहरीले आन्दोलनरत शिक्षकहरुमाथि गरे लाठी चार्ज

लोक सम्वाददाता
जनकपुरधाम, साउन १ गते ।
चक्काजाम गरेको भन्दै गत १२ दिनदेखि धर्नामा बसेका अस्थायी शिक्षकहरुमाथि प्रहरीले लाठी चार्ज गरेको छ ।
बुधवार अस्थायी शिक्षक आन्दोलन परिचालन समितिले आफुहरुको माग पुरा नभएको भन्दै प्रदेशका जनकपुरधाम स्थित मुख्यमन्त्री तथा मन्त्रीपरिषदको कार्यालय अगाडी चक्काजाम गरेपछि प्रहरीले लाठी चार्ज गरेको हो ।
अस्थायी शिक्षकहरुलाई पुर्ववत रुपमा उमेरको हदसम्म पेशाको ग्यारेन्टी र औषधी उपचारको व्यवस्थाको माग गर्दै उनीहरु अषाढ १९ गतेदेखि मुख्यमन्त्री तथा मन्त्री परिषदको कार्यालय अगाडी धर्नामा बस्दै आएका छन् ।
जीवनको महत्वपुर्ण समय मुलुकको शिक्षा क्षेत्रमा बिताएको र बुढेशकालमा सरकारले आफुहरुको रोजगारी खोसिदा कहाँ जाने भनी गुनासो पोख्दै आएका छन् ।
शिक्षकहरुले गरेको चक्काजामका कारण त्यस क्षेत्रमा केही बेरसम्म आवात जावत अवरुद्ध भएको थियो ।
अस्थायी शिक्षक आन्दोलन परिचालन समितिका संयोजक धमेन्द्र कुमार यादवले संघिय सरकारको गलत नितिका कारण प्रदेश २ का करिव १ हजार २ सय शिक्षकको रोजगार खोसिने बताए ।
संविधानको धारा ३३ मा मौलिक हक अन्तर्गत रोजगारीको व्यस्था गरिएपनि सरकारले आफुहरुलाई चक्काजाम गर्न वाध्य बनाएको संयोजक यादवले बताए ।
संयोजक यादवले प्रदेशका मुख्यमन्त्री समेत धर्नास्थलमा आएर समस्या समाधान गर्ने आश्वासन दिएपनि अहिलेसम्म कुनै पहल नगरेको आरोप समेत लगाए ।
उता, दुवै पक्षबीच झडपको क्रममा प्रहरीमाथि हातपात गरेको भन्दै प्रहरीेले शशिकला भट्टराई, जुरनी मण्डल,रेखा कापड,किरण यादव,मुकेश तिवारी,आनन्द चौरसिया,सलिम अन्सारी लगायतका शिक्षक शिक्षिकाहरुलाई पक्राउ गरेको छ ।