लोक सम्वाददाता
जनकपुरधाम, असार ३१ गते ।
दलित तथा विपन्नलाई सुविधा सम्पन्नलाई आवास दिने सरकारको जनता आवास योजनाले प्रदेश नम्बर २ को अस्थायी राजधानी जनकपुरधाममा दर्जनौ दलितलाई आवास बिहिन बनाइ दिएको छ ।
जनता आवास कार्यक्रम अन्तर्गत जनकपुरधाम उपमहानगरपालिका वडा नम्बर २४ बसहिया स्थित वर्षौदेखि फुसको घर निर्माण गरी बस्दै आएको थियो, तर सरकारले ल्याएको जनता आवास कार्यक्रमले उनलाई आवास दिने आश मेटियामेट गरी आवास बिहिन नै अहिले बनाई दिएको छ ।
गत हप्तादेखि निरन्तर रुपमा भइरहेको वर्षाले आएको बाढीको समयमा आवास बिहिन भएका बसहियाका दलितहरु अहिले अलपत्र भई बिचल्लीमा परेका छन् । असारे विकास निर्माणका कारण सुविधायुक्त घर कहिले बन्छ ठेकान छैन तर अहिले उनीहरु हिलोमा त्रिपाल राखेर दिन कष्टकर जीवन बिताउन बाध्य भएका छन् ।
तिनीहरुलाई अहिले न शौचलाय, न त बास बस्ने घर, न त खानेकुरा केही छैन । गएको बुधबारदेखिको अविरल वर्षाका कारण आफूहरु निकै सकसमा रहेको जनकपुरधाम उपमहानगरपालिका वडा नम्बर २४ की २५ वर्षिय पञ्चा देवी दासले बताइन् ।
उनले भनिन् पहिला फुसको घर भएपनि आराम चैनको जिन्दगी बिताइरहेको थिए तर सुविधा सम्पन्न घर बनाई दिने जनता आवासको आशले आफूहरुलाई अहिले बाढीको समयमा घरबार बिहीन बनाई सडकमा ल्याई दिएको छ । हामी अब न त घर को न घाट कै रहन पाए, घर बन्छ कहिले कहिले तर पिडा भोगिरहेको अहिले, कसैले हेर्नपनि आएको छैन, हामी कुन अवस्थामा छौ ।
पछिलो समय उपमहानगरपालिकामा गाभिएको वडा २४ बसाहिया टोलका ५ सय बढी मुसहर समुदाय गूठीको जग्गामा ८ वर्षदेखि बस्दै आएका छन् । वर्षाले गर्भवती, बालबालिका र वृद्धवृद्धा थप प्रभावित बनेका छन् ।
जनता आवासदारा दलितका लागि निर्माण भइरहेको घरको जग्गा समेत विवादित रहेको छ, सो जग्गामा स्थानीय नरसिंह मन्दिर अन्तर्गत आफ्ना रहेको भन्दै गुठी संस्थानले दाबी गर्दै आएको कारण घर निर्माण हुन्छ कि हुदैन भन्ने चिन्ता समेतले उनीहरुलाई सताएको छ ।
सो जग्गामा बसोबास गर्दै आएका दलित समुदायका ९० जना मुसहर जातिका परिवारका लागि जनता आवास कार्यक्रम मार्फत घर निर्माण प्रदेश २ सरकारले गर्न लागेको हो ।
सरकारले ल्याएको जनता आवास कार्यक्रम अन्तर्गत प्रदेश नम्बर २ सरकारले विपन्न वर्गलाई राहत होस् भन्ने उद्देश्यले एक महिना अगाडी आवास निर्माण कार्य शुरु गरेको थियो । गत असार ५ गते प्रदेश दुई सरकारका भौतिक पूर्वाधार विकास मन्त्री जितेन्द्र सोनलले जनता आवास कार्यक्रमको शिलान्यास गरेका थिए । तर वर्षा शुरु हुनुभन्दा अगावै आवास निर्माण सम्पन्न हुन नसक्दा विपन्न वर्ग अहिले अलपत्र भई विचल्लीमा परेका छन् ।
यो विषयमा आफ्नो प्रतिक्रिया दिनुहोस् !