जनकपुरधाममा साधुको भेष बाल यौन दुव्र्यवहारकर्मी, आरोपित फरार

लोक सम्वाददाता
जनकपुरधाम, असार २२ गते ।
धार्मिक नगर जनकपुरधाम स्थित एक मन्दिरका पुजारीले वर्षौदेखि बाल यौन दुव्र्यवहार गर्दै आएको खुलासा भएको छ ।
जनकपुरधाम स्थित साधु सन्तहरुको रामानन्दीय सम्प्रदायका अगुवा र विभिन्न संघ संघ संस्थाका प्रतिनिधिहरुले साधुको भेषमा जनकपुरस्थित तुलसी स्मारकका पुजारी शिवशंकर दास रामायणी बाल दुव्र्यवहार गर्ने आरोपित रहेको भन्दै कारवाहीको मांग गरेका छन् ।
आइतवार ती साधुसन्तहरुको टोली जिल्ला प्रहरी कार्यालय धनुषामा डेलिगेशन गई आरोपित ती पुजारीमािथ कारवाहीका मांग गरेका छन् । डेलिगेशन टोलीलाई प्रहरी उपरिक्षक शेखर खनालले जाहेरी दिन सुझाव दिदै आरोपितलाई नछाडने प्रतिबद्धता जनाएका छन् ।
तुलसी स्मारक कुटीका पुजारी शिवशंकर दासले लामो समयदेखि ट्यूसन पढाउने बहानामा छात्राहरुसँग यौनदुराचार गर्दै आएकोले कारवाहीको माँग गरेको जानकी मन्दिरका उत्तराधिकारी महन्त रामरोशन दास वैष्णवले बताए ।
गलत कृयाकलापले धर्म र समाजमा विकृति बढेका भन्दै साधुसन्तको टोलीले तत्काल यस समस्याको समाधानका लागि तुलसी स्मारकबाट पदच्यूत गरी हटाउन र कारवाही गर्नका लागि पनि माग समेत गरेका थिए । पुजारी दासमाथि हालसम्म ६ जना भन्दा बढी बालिकासंग यौनदुष्कर्म गरेको आरोप छ । जसमध्ये एक जना पीडित परिवारले मात्रै साधु सन्तको सहयोगमा कारवाहीका लागि जिप्रका पुगेका थिए ।
भारत बिहारको सुपौल जिल्ला निवासी पुजारी शिवशंकर घटना सार्वजनिक भए लगतै फरार रहेको बुझिएको छ । तुलसी स्मारकमा रहेको तत्कालिन रामानन्दीय वैष्णव संघका अध्यक्ष तथा रत्नसागर मठका महन्त वैकुण्ठ दास वैष्णवले आफ्नो निकटका व्यक्ति रहेका शिवशंकरलाई पुजारीको रुपमा नियुक्त गरेका थिए ।
यता विभिन्न मुद्दामा अपराधि सावित भइसकेका रत्नसागर मठका महन्त वैकुण्ठ दास वैष्णव जालसाजी तथा ठगी मुद्दा तथा ज्यान कर्तव्य मुद्दामा १२ वर्षको लागि जेल सजाय फैसला पूर्व नै भारततर्फ फरार छन् । महन्त वैकुण्ठ दास वैष्णवका शिष्य समेत रहेका शिवशंकर दासले गुरु वैकुण्ठ दासको काम गर्दै आएका थिए ।