लोक सम्वाददाता
राजविराज, असार २० गते। सप्तरीको सुरुङ्गा नगरपालिका वडा नम्वर १ मा एक युवकले जन्म दिने आफ्नै आमाको हत्या गरेका छन।
बिहीवार राति ६४ वर्षीया धनमाया पुलामीलाई आफ्नै छोराले खुकुरी प्रहार गरी हत्या गरेको छ ।
इन्सेक अनलाइनमा उल्लेख भए अनुसार हत्याको आरोपमा प्रहरीले ३४ वर्षिय छोरा रिठ्ठे भनिने जङ्गबहादुर पुलामीलाई पक्राउ गरेको हो । शवको नजिकै घरको आंगनमा दुवै हातमा खुकुरी लिएर उफ्रिरहेको अवस्थामा आरोपित रिठे पक्राउ समेत परेको इलाका प्रहरी कार्यालय कडरबोनामाले जनाएको छ।
खुकुरी प्रहारबाट महिलाको गर्दन सहित टाउको पछाडि तीन ठाउँमा र अनुहारमा दुई ठाउँमा काटिएको रक्ताम्य अवस्थामा धनमायाको शव फेला परेको जिल्ला प्रहरी कार्यालयले जनाएको छ । खुकुरी बोकेर धम्क्याई रहेको अवस्थामा आरोपितलाई गिरफ्तार गरिएको इलाका प्रहरी कार्यालय भेडियाका प्रहरी निरीक्षक प्रकाश बस्नेतले बताएका छन् । के कति कारणले हत्या गरिएको घटना बारे अनुसन्धान भई रहेको जिप्रका सप्तरीले जनाएको छ।
मोबाइलमा रिचार्ज र घरमा खैनी सकिएको धनमायाले भनेपछि उनका पति ६५ वर्षीय लोकबहादुर पुलामी बजार गएको बेला छोराले नै आमाको हत्या गरेको लोकबहादुरले जानकारी दिएका छन् ।
शवलाई पोष्टमार्टमकालागि विहीबारै राति रामप्रसाद शारदा उमाप्रसाद मुरारका अस्पताल लहान पठाईएको छ । जङ्गबहादुर मनोरोगी भएको आशङ्का गर्दै घर छाडेकी उनकी पत्नी एक छोरा र एक छोरीका साथ उदयपुरको रौतास्थित माइतमा बस्दै आएकी छिन् ।
यो विषयमा आफ्नो प्रतिक्रिया दिनुहोस् !