लोक सम्वाददाता
जनकपुरधाम, असार १९ गते ।
जनकपुर जलेश्वर सडक र जलेश्वर नगरपालिका भित्रका सडक ठेकेदारको लापरवाहीको कारण समयमा निर्माण हुन नसक्ने ठहर सहितको प्रतिवेदन अनुगमन समितिले बुझाएको छ ।
समयमै र गुणस्तर सडक निर्माणको मांग गर्दै स्थानीयले पटक पटक मांग गर्दै आएको बेला संघीय सरकारले सांसद इन्दु शर्माको संयोजकत्वमा ४ सदस्यीय एक समिति गठन गरेको थियो । सो समितिले अनुगमनपछि आफ्नो प्रतिवेदन विकास तथा प्रविधि समितिका सभापति कल्याणी खड्कालाई बुझाएको छ ।
अनुगमन समितिले नेपाल भारत सीमालाई जोड्ने निर्माणाधीन जनकपुर–भीठामोड सडक खण्डको निर्माण कार्य तीन वर्षमा सक्नु पर्नेमा समयावधि सकिन मात्र चार महिना बाँकी रहदासम्म कार्य प्रगति शून्य देखिएको ठहर गरेको छ । प्रतिवेदनमा सडकको पहिलो स्टेप अर्थात जग नै कमजोर, गुणस्तरहीन, सम्झौता विपरीत कार्य भएको पाइएको उल्लेख गरिएको छ ।
हुलाकी राजमार्ग निर्देशनालय जनकपुरका कर्मचारी, धनुषा र महोत्तरीका प्रहरी–प्रशासनको साँठगाँठले सडक कमजोर र मापदण्डविपरीत निर्माण भइरहेको आरोप लाग्दै आएको बेला अनुगमन समितिले आफ्नो कार्य थालेको थियो ।
जनकपुर भीठमोड सम्मको कूल १८ किलोमीटरको सो सडकखण्डको निर्माणको जिम्मा ३ वर्षमा कार्य सम्पन्न गर्ने गरी ९३ करोडमा प्रतिभा वाई पी जेभी ललितपुर र आशिष पप्पु–रोशन जेभी जनकपुरले प्याकेजमा ठेक्का लिएका हुन् । सम्झौताको म्याद सकिन मात्र ४ महिना बांकी रहेको अवस्थामा प्रतिभाले ५८.२२ र आशिषले ४८.४४ प्रतिशत काम सम्पन्न गरेको प्रगति प्रतिवेदनमा देखाएको छ ।
सडकमा टनका टन भारी लिएर १८ चक्के मालवाहक सवारीसाधन गुडने सडकमा सामान्य आटोसिल कालोपत्रे गरिँदै छ जबकि उच्च श्रेणीको डीबीएसटी कालोपत्रे गर्ने ठेक्केदारसँग सम्झौता रहेको समिति सदस्य मिनाक्षी झाले बताएकी छिन् ।
यो विषयमा आफ्नो प्रतिक्रिया दिनुहोस् !