लोक सम्वाददाता
जनकपुर, असार १८ गते।
किर्ते जालसाजी मुद्दामा पुर्पक्षको सजायमा फरार रहेका जनकपुरधाम स्थित रत्नसागर मन्दिर महन्थ बैकुण्ठ दासलाई हत्या आरोपमा १२ वर्ष कैद सुनाइएको छ।
जिल्ला शिक्षा कार्यालय महोत्तरीका तत्कालीन शाखा अधिकृत लाल झाको कर्तव्य ज्यान मुद्दामा आरोपी उनलाई बुधवार उच्च अदालत जनकपुरले १२ वर्षको सजाय सुनाएको हो।
मुख्य न्यायाधीश हरिकुमार पोखरेल र न्यायाधीश बालकृष्ण उप्रेतीको संयुक्त इजलासले जिल्ला अदालतको फैसलालाई पल्टाउँदै महन्त दासलाई १२ वर्षको जेल सजाय सुनाएको हो ।
जनकपुरधाम ८ स्थित नीजि निवासबाट मोटरसाइकलमा जलेश्वरका लागि हिँडेका झाको २०६७ कार्तिक ११ गते गोली प्रहार गरी हत्या भएको थियो। सो घटनाको योजनाकार रहेको ठहर गर्दै उच्च अदालत जनकपुरले सो सजाय सुनाएको अधिवक्ता विमल मिश्रले जानकारी दिए।
यसअघि जिल्ला अदालतले घटनामा संलग्न भनिएका शिवकुमार ठाकुर, सुनिलकुमार अधिकारी र राकेश पाण्डेयलाई जन्मकैदको फैसला सुनाएको थियो भने महन्त दासलाई सफाइ दिएको थियो। उच्च अदालत जनकपुरले शिवकुमार, सुनिल र राकेशको हकमा भने जिल्ला अदालतको फैसलालाई सदर गरेको छ।
केही महिना पहिले किर्ते जालजासी गरी मठमन्दिरको जग्गा बेचबिखन तथा ठगी गरेको मुद्दामा उच्च अदालत जनकपुरले दासलाई पुर्पक्षका लागि हिरासतमा राख्न आदेश दिएको थियो। उच्च अदालतले आदेश आएसंगै उनी हालसम्म फरार रहेको छ।
यो विषयमा आफ्नो प्रतिक्रिया दिनुहोस् !