जनकपुरधाम, जेठ २४ गते ।
जनकपुरधाम उपमहानगरपालिकाकी उपप्रमुख रिता कुमारी मिश्रले आफूलाई बेवास्ता गरिएको भन्दै पालिकाको विभिन्न उपसमितिको संयोजक पदबाट राजीनामा दिएकी छिन् ।
शुक्रवार उपमेयर मिश्रले एक्सन कमिटी, लामखुट्टे नियन्त्रण कमिटी र रंग पेन्ट वितरण सहितको कमिटीले आफूलाई बेवास्ता गर्दै काम गर्दै आइरहेको कारण आफू सो ती समितिहरुको संयोजकमा नबस्ने भन्दै मेयर लालकिशोर साहलाई लिखित रुपमै राजीनामा सहितको निवेदन दर्ता गराएकी छिन् ।
उपमेयर मिश्रलाई नगरको सडक बिस्तारका लागि घरहरू भत्काउन तथा तोडफोड गर्न एक्सन कमिटी, उपमहानगरपालिकालाई लामखुट्टे मुक्त गर्न लामखुट्टे नियन्त्रण र नगरभित्रका सबै घर तथा पसल एउटै रंग केसरिया रंगबाट पेन्ट गर्नका लागि वितरण गरिएने पेन्टका लागि बनाइएको रंगपेन्ट वितरण कमिटीको संयोजक बनाइएको थियो ।
तर सडक विस्तारका लागि हालसम्म भत्काइएको सार्वजनिक तथा निजी घर पर्खाल बारे कुनै जानकारी नगराइएको भन्दै उपमेयर मिश्रले संचारकर्मीसंग भनिन् कमिटीको संयोजक आफू भएपनि कुन मापदण्ड र कतिको संख्या तथा क्षेत्रमा तोडफोड गरिएको कुनै जानकारी गराइएको छैन, भोलीको दिनमा कसैले मुद्दा हाले भने आफू नै फंस्ने सम्भावना भएकोले राजनीमा गरेकी हुँ ।
साथै उनले शहरमा लामखुट्टे नियन्त्रणका लागि अहिले मोबिल छर्किने काम भई रहेको छ । तर त्यस बारे पनि आफूलाई कुनै जानकारी गराइएको छैन, कति मोबिल वा कति औषधि वा कुन कुन ठाउँमा छर्किने काम भइरहेको छ ।
उपमेयर मिश्रले नगरको सौन्दर्यताका लागि नगरभित्र एउटै रंगको घर र पसलहरुमा पेन्ट गर्न निशुल्क रुपमा वितरण गरिएको पेन्ट बारे पनि आफूलाई कुनै जानकारी छैन मनलाग्नदी रुपमा वितरण गरिएको अनियमितता भयो भने आफू नै फंस्ने भएको लगायतका कारणले गर्दा पदमा नबस्ने निर्णय गरेर राजीनामा गरेको बताईन ।
उनले जनकपुर उपमहानगरपालिकाका प्रमुख लाल किशोर साह, प्रमुख प्रशासकीय अधिकृत सीता परियार र कमिटीमा रहेका वडाध्यक्षहरूको सिफारिसमा ती सबै काम भइरहेको आरोप समेत उनले लगाएकी छिन् ।
यो विषयमा आफ्नो प्रतिक्रिया दिनुहोस् !