बारा मालपोतका कर्मचारीले अढाई करोड रकम चोरयो

कलैया, जेठ २ गते । मालपोत कार्यालय बाराका कर्मचारीहरुले संकलन गरिएको राजश्वबाट अढाई करोड रुपैया चोरी गरेको खुलासा भएको छ ।
गत २० कात्तिक २०७४ देखि २८ साउन २०७५ सम्म कार्यालयमा ४ करोड ७३ लाख ६९ हजार ४० रुपैयाँ संकलन गरिएको थियो । तर, तत्कालीन मालपोत अधिकृतसहितका कर्मचारीले २ करोड ५० लाख ८६ हजार ६ सय ४० रुपैयाँ चोरी गरेको खुलासा अख्तियार दुरुपयोग अनुसन्धान आयोगको अनुसन्धानबाट खुलेको छ ।
मालपोत कार्यालय कलैयाका रजिष्ट्रेसन फाँट ३ का फाँटवाला मदन प्रसाद गुप्ताले कार्यरत रहेको अवधिमा कार्यालयमा बुझेको राजश्व रसिद, आफूले पारित गरेका सक्कलै लिखतहरु र सो सँग सम्बन्धित अन्य कागजातहरु कार्यालयमा नबुझाएपछि अख्तियारले छानबिन शुरु गरेको थियो ।
अख्तियारको छानबिनका क्रममा फाँटवाला गुप्ताले नक्कली रसिद समेत प्रयोग गरेर राजश्व संकलन गरेको देखिएको छ । फाँटवाला गुप्ताले २० कात्तिक २०७४ देखि २८ साउन २०७५ सम्म सक्कली रसिद प्रयोग गरेर ३ करोड ३७ लाख ९८ हजार ७ सय ४६ रुपैयाँ राजश्व संकलन गरेका थिए । उक्त अवधिमा नक्कली रसिद प्रयोग गरेर १ करोड ३५ लाख ७० हजार २ सय ९४ रुपैयाँ राजश्व संकलन गरिएको अख्तियारको अनुसन्धानबाट देखिएको छ ।
नक्कली र सक्कली रसिद प्रयोग गरी उक्त अवधिमा ४ करोड ७३ लाख ६९ हजार ४० रुपैयाँ संकलन भएको अख्तियारले जनाएको छ । जसमध्ये फाँटवाल गुप्ता, कार्यालय प्रमुख त्रिवेदीसहितका कर्मचारीले २ करोड २२ लाख ८२ हजार ४ सय रुपैयाँ मात्रै कार्यालयमा बुझाएर बाँकी रकम चोरी गरेर खाइ मासेको अख्तियारको दाबी छ ।
अख्तियारले उक्त रकम चोरी गरी खाइ मास्ने कार्यमा संलग्न रहेको भन्दै मालपोत कार्यालय कलैयाका तत्कालीन प्रमुख राजराजेश्वर त्रिवेदी, फाँटवाला (नायव सुब्बा) मदन प्रसाद गुप्ता, लेखापाल युगल किशोर ठाकुरविरुद्ध मुद्दा दायर समेत गरेको छ ।
सो अनियमितता प्रकरणमा अख्तियारले बदनियतपूर्वक लेखा परीक्षण प्रतिवेदन तयार पारेको भन्दै कोष तथा लेखा नियन्त्रक कार्यालय बाराका लेखापालद्वय प्रविण गौतम र कमल खतियार तथा महालेखा परीक्षकको कार्यालय बबरमहल काठमाडौंका निर्देशक अजय कुमार सापकोटाविरुद्ध पनि भ्रष्टाचार मुद्दा दायर गरेको बुझिएको छ ।