जनकपुरधाम । गगन थापा नेतृत्वको नेपाली कांग्रेसको १५ औँ महाधिवेशनमा पूर्वसहमहामन्त्री महेन्द्र यादवसहित ८ जनाले मधेशी समूहतर्फ उम्मेदवारी दिएका छन् । असोज २२ गते हुने निर्वाचनका लागि उम्मेदवारी दिनेहरुमा महेन्द्र यादव, अजय चौरसिया, नागिना यादव, किरण यादव, अभिषेक प्रताप साह, रामपल्टन साह, मनिषकुमार मिश्र र मुक्तकुमारी यादव रहेका छन् ।
प्रतिस्पर्धाले मधेसमा कांग्रेसको पुरानो विरासतदेखि नयाँ राजनीतिक धारसम्मको प्रतिनिधित्वलाई एकै ठाउँमा ल्याएको छ । मधेशी समूहतर्फ पार्टीका पछिल्लो पटकका सदस्यदेखि पदाधिकारीसम्मका अनुभवी तथा नवप्रवेशीहरु समेतले उम्मेदवारी दिएका छन् ।
यी उम्मेदवारहरु मध्ये पार्टीमा सबैभन्दा बढी लगानी, योग्यता र क्षमता भएका महेन्द्र यादव नै रहेको मधेशका प्रतिनिधिहरुको भनाई छ । उम्मेदवारहरु कोही पार्टी अदल बदल गरी अवसर नपाएपछि पुनः कांग्रेसमै आएका हुन् भने कोही नवप्रवेशी जसले कांग्रेस बुझ्नै समय लाग्छ । केही त यस्ता पनि छन, जुन परिवारको लगानीबाट अवसर पाएका छन ।
यी मध्ये महेन्द्र यादव पार्टीको संस्थागत नेता हुन । जसले कांग्रेस छोडेर कहिलेपनि यताउता गएको छैन । ग्रामीणस्तरबाटै मेहनत गरेर मधेशमा स्थापित भई पछिल्लो पटक सहमहामन्त्रीसम्म पुगेका थिए । एक पटक कार्यकाल चलाई सकेको र उनीसँग संगठन विस्तार र सबैलाई एकताबद्ध गरेर लैजाने अनुभव समेत उहाँसँग रहेको प्रतिनिधिहरुको भनाई छ ।
महेन्द्र यादवसँगै अन्य उम्मेदवारहरुको कांग्रेसमा लगानीको योग्यता, सक्रियता, संगठन विस्तारमा भूमिका यस्तो रहेको छ ।
महेन्द्र यादव : संगठनको लामो अनुभव
धनुषाका महेन्द्र यादव कांग्रेसको संस्थागत राजनीतिमा लामो समयदेखि सक्रिय नेता हुन् । उनी यसअघि नै सहमहामन्त्री तथा मन्त्रीको जिम्मेवारी सम्हालिसकेका छन् । १४औँ महाधिवेशनमा मधेसी क्लस्टरबाट सहमहामन्त्री निर्वाचित भएका यादव यसपटक सोही पदमा पुनः प्रतिस्पर्धामा उत्रेका छन् ।
देउवा समूहका बलिया र मधेशका स्थापित नेताको रुपमा परिचित विशेष महाधिवेशनमा सहभागी नभएपनि पार्टीभित्र एकताबद्ध भएर अघि बढ्नुपर्ने धारणा राख्दै गगन थापालाई सभापतिमा स्वीकार गर्दै समूहमा सहभागी भएका थिए ।
यादव तरुण दलका पूर्वकेन्द्रीय अध्यक्षसमेत हुन् । उनी संविधानसभा तथा व्यवस्थापिका–संसदका सदस्य भइसकेका छन् भने खानेपानी तथा सरसफाइमन्त्रीको जिम्मेवारीसमेत सम्हालिसकेका छन् ।
कांग्रेसभित्र लामो समय देउवा पक्षका प्रभावशाली मधेसी नेताका रूपमा रहेका यादवलाई पछिल्लो राजनीतिक परिवर्तनपछि गगन थापाले केन्द्रीय सदस्यमा मनोनीत गरेका थिए । त्यसयता उनले पार्टीभित्र विभाजनभन्दा एकता र साझा नेतृत्वमा जोड दिँदै आएका छन । पछिल्लो समय मधेशमा कांग्रेसको जनाधार फर्काउने लक्ष्यसहित पुनः सहमहामन्त्रीमै उम्मेदवारी दिएको उनको भनाई छ ।
अजयकुमार चौरसिया : कांग्रेस–सद्भावना–कांग्रेस
पर्साका अजयकुमार चौरसिया मधेसका पुराना राजनीतिक अनुहार हुन् । उनको राजनीतिक यात्रा कांग्रेसबाट सुरु भए पनि २०४८ सालको निर्वाचनताका टिकट नपाएपछि सद्भावना राजनीतिमा पुगेको र पछि पुनः कांग्रेसमै फर्किएको थियो ।
त्यस यता उनले महासमिति सदस्यदेखि केन्द्रीय सदस्यसम्मको जिम्मेवारी सम्हालेका छन् । उनी सांसद र मन्त्रीसमेत भइसकेका छन् । लामो संसदीय तथा संगठनात्मक अनुभव उनको प्रमुख राजनीतिक पूँजी हो । पछिल्लो समय उनी पनि गगन थापा नेतृत्वको कांग्रेसको मूलधारमा महेन्द्र यादवसँगै सदस्यमा समेटिएका थिए ।
नागिना यादव : नेविसंघबाट महिला नेतृत्वसम्म
महोत्तरीकी नागिना यादवको राजनीतिक सक्रियता विद्यार्थी राजनीतिबाट नै गरेका हुन् । २०५३ सालमा उनले अध्ययनका क्रममा नेपाल विद्यार्थी संघसँग जोडिएर कांग्रेस राजनीतिमा प्रवेश गरेकी नेत्रृ हुन् ।
१४औँ महाधिवेशनबाट मधेसी महिला कोटामा केन्द्रीय सदस्य बनेकी उनी पछिल्लो समय कांग्रेसको केन्द्रीय राजनीतिमा निरन्तर सक्रिय छिन् । उनी पनि थापा नेतृत्वको कार्यसमितिमा सदस्यमा मनोयन भएकी थिइन ।
किरण यादव : संविधानसभा हुँदै केन्द्रीय राजनीतिमा
महोत्तरीकै अर्का महिला नेतृ किरण यादव पनि उम्मेदवार छिन् । उनको राजनीतिक यात्रा संसदीय राजनीतिसँगै शुरु भएको हो । उनी पहिलो संविधानसभा निर्वाचनपछि संविधानसभा सदस्य बनिन् र दोस्रो संविधानसभामा पनि निर्वाचित भइन् ।
पछिल्लो महाधिवेशन प्रक्रियामा उनी शेखर कोइराला समूहसँग नजिक रहेकी नेतृका रूपमा पनि चिनिन्थिन् । तर अहिले गगन थापा नेतृत्वको महाधिवेशन प्रक्रियामा सहभागी छिन् ।
अभिषेकप्रताप शाह : फोरमबाट कांग्रेससम्म
कपिलवस्तुका अभिषेकप्रताप शाहको राजनीतिक यात्रा अन्य उम्मेदवारभन्दा फरक छन् । उनको प्रारम्भिक राजनीतिक सक्रियता तत्कालीन मधेसी जनअधिकार फोरम नेपालको विद्यार्थी राजनीतिबाट भएको हो ।
फोरमको विद्यार्थी संगठनबाट सुरु भएको उनको यात्रा संविधानसभा सदस्य हुँदै राष्ट्रिय राजनीतिसम्म पुगेका साह २०७४ सालको प्रतिनिधिसभा निर्वाचनअघि उनी नेपाली कांग्रेसमा प्रवेश गरे र त्यसपछि कांग्रेसबाटै संसदीय राजनीतिमा स्थापित छन् ।
रामपल्टन साह : नयाँ पुस्ताको अनुहार
धनुषाका रामपल्टन साह कांग्रेसभित्र नयाँ पुस्ताको राजनीतिक अनुहारका रूपमा अघि बढेका छन् । उनको राजनीतिक यात्रामा स्वर्गीय नेता प्रदीप गिरीको प्रभाव महत्वपूर्ण मानिन्छ ।
विशेष महाधिवेशनका क्रममा पार्टीभित्र नेतृत्व परिवर्तन र संगठन सुधारको बहसमा उनी सक्रिय देखिएका थिए । विशेष महाधिवेशनपछि उनी मधेसी खुलातर्फ केन्द्रीय सदस्य बने । पुराना नेताहरूको तुलनामा छोटो राजनीतिक यात्रामै पदाधिकारीमा दाबी गर्नु उनको महत्वाकांक्षी छलाङका रूपमा हेरिएको छ।
मनिषकुमार मिश्र : लोसपाबाट कांग्रेसमा छिर्दै पदाधिकारीमा दाबी
सर्लाहीका मनिषकुमार मिश्रको कांग्रेस यात्रा भने सबैभन्दा नयाँमध्ये हुन । जेनजी पुस्ताको वकालत गर्दै आएका पछिल्लो पटक प्रतिनिधि सभाको निर्वाचनमा उनी लोकतान्त्रिक समाजवादी पार्टी (लोसपा) बाट कांग्रेसमा प्रवेश गरेका थिए । हुनत उनी लोसपामा महासचिव सम्हालिसकेका छन् ।
प्रतिनिधिसभा निर्वाचनअघि कांग्रेस प्रवेश गरेका मिश्रलाई सभापति गगन थापाले पार्टी प्रवेशसँगै केन्द्रीय सदस्यमा मनोनयन गरेका थिए । यसरी कांग्रेसमा प्रवेश गरेको छोटो समयमै उनी केन्द्रीय सदस्य हुँदै सहमहामन्त्रीमा दाबी गरेका छन् ।
मुक्ताकुमारी यादव : मधेसी महिला प्रतिनिधित्व
धनुषाकै अर्का उम्मेदवार हुन मुक्ताकुमारी यादव । उनी कांग्रेसमा मधेसी महिला नेतृत्वको रुपमा परिचित छिन् । १४औँ महाधिवेशनबाट मधेसी महिला कोटामा केन्द्रीय सदस्य बनेकी उनी पछिल्लो विशेष महाधिवेशनबाट मधेसी क्लस्टरतर्फ सहमहामन्त्री निर्वाचित भएकी थिइन् ।
यो विषयमा आफ्नो प्रतिक्रिया दिनुहोस् !