जनकपुरधाम । प्रदेश प्रहरी गठन, समायोजन तथा सञ्चालनका लागि आवश्यक कानुनी आधार निर्माण गर्ने प्रक्रियालाई मधेश प्रदेश सरकारले अघि बढाएको छ।
प्रदेश प्रहरीसम्बन्धी कानुन कार्यान्वयनमा ल्याउन आवश्यक ऐन, विधेयक, नियमावली तथा नियमहरू तयार गरी प्रदेश सरकारले संघीय सरकारसमक्ष हस्तान्तरण गरेको हो।
प्रदेश प्रहरी सेवा, प्रहरी कर्मचारी समायोजन तथा नेपाल प्रहरी र प्रदेश प्रहरीबीच कार्यसम्पादन, सुपरिवेक्षण र समन्वयका विषयमा आवश्यक कानुनी व्यवस्था गर्न तयार पारिएका विभिन्न दस्तावेज प्रदेश सरकारका गृह, सञ्चार तथा कानुनमन्त्री फकिरा महतोले संघीय गृहमन्त्री सुदन गुरुङलाई हस्तान्तरण गरेका छन्।
मधेश प्रदेश सरकारले हस्तान्तरण गरेका दस्तावेजमा प्रदेश राजपत्रमा प्रकाशित ‘प्रदेश प्रहरी सेवा सम्बन्धमा व्यवस्था गर्न बनेको ऐन’, ‘नेपाल प्रहरी र प्रदेश प्रहरीले सम्पादन गर्ने कार्यको सञ्चालन, सुपरिवेक्षण र समन्वय सम्बन्धमा व्यवस्था गर्न बनेको विधेयक’ तथा ‘प्रहरी कर्मचारीलाई नेपाल प्रहरी तथा प्रदेश प्रहरीमा समायोजन गर्ने सम्बन्धमा व्यवस्था गर्न बनेको विधेयक’ लगायत रहेका छन्।
त्यसैगरी, प्रदेश प्रहरी नियमावली तथा मन्त्रिपरिषद्बाट स्वीकृत प्रदेश प्रहरी ऐन, २०७५ को दफा १०१ ले दिएको अधिकार प्रयोग गरी प्रदेश सरकारले तयार पारेका नियमहरू पनि एकमुष्ट रूपमा संघीय गृहमन्त्री गुरुङलाई हस्तान्तरण गरिएको मन्त्री महतोले बताएका छन्।
मन्त्री महतोका अनुसार तत्कालीन आन्तरिक मामिला तथा कानुनमन्त्री ज्ञानेन्द्र यादवको संयोजकत्वमा गठित कानुन मस्यौदा तथा परिमार्जन समितिको बैठकबाट प्रदेश प्रहरीसम्बन्धी नियमहरू तयार पारिएका हुन्। समितिले नियम १ देखि १४८ सम्मका प्रावधानहरू सर्वसम्मत रूपमा तयार गरेको उनले जानकारी दिए।
संघीय संरचना लागू भएको लामो समय बितिसक्दा पनि प्रदेश प्रहरीको गठन, प्रहरी कर्मचारी समायोजन तथा नेपाल प्रहरी र प्रदेश प्रहरीबीचको अधिकार क्षेत्रका विषयमा कानुनी तथा प्रशासनिक जटिलता रहँदै आएको छ।
यस्तो अवस्थामा प्रदेश सरकारले तयार पारेका कानुनी दस्तावेज संघीय सरकारलाई हस्तान्तरण गर्नुलाई प्रदेश प्रहरी व्यवस्थापनको प्रक्रियामा महत्वपूर्ण कदमका रूपमा लिइएको छ।
प्रदेश प्रहरीसम्बन्धी ऐन, नियमावली तथा प्रहरी कर्मचारी समायोजनसम्बन्धी कानुनी व्यवस्था कार्यान्वयनमा आए प्रदेशभित्रको शान्ति सुरक्षा व्यवस्थापनमा प्रदेश सरकारको भूमिका थप स्पष्ट हुने अपेक्षा गरिएको छ। ।
यो विषयमा आफ्नो प्रतिक्रिया दिनुहोस् !