जनकपुरधाम । आम नागरिककाे दैनिकी र सद्भाव रैलीकाे दृष्टिगत गर्दै धनुषा जिल्ला प्रशासन कार्यालयले जारी कर्फ्युलाई शनिवार आंशिक खुकुलाे बनाएकाे छ ।
शनिबार बिहान पाँच घण्टाका लागि आंशिक रूपमा खुकुलो बनाएको जिल्ला प्रशासन कार्यालयले एक सुचना जारी गरि जनाएकाे छ।
सर्वसाधारणलाई दैनिक उपभोगका अत्यावश्यक वस्तु सहज रूपमा खरिद गर्न सकून् भन्ने उद्देश्यले बिहान ५:०० बजेदेखि १०:०० बजेसम्म कर्फ्यु खुकुलो पारिएको सुचनामा भनिएकाे हो।
प्रमुख जिल्ला अधिकारी प्रेमप्रसाद लुइँटेल द्वारा जारी सूचनाअनुसार उक्त अवधिमा दूध, तरकारी, फलफूल, खाद्यान्न लगायतका अत्यावश्यक उपभोग्य वस्तु खरिद गर्न सर्वसाधारणलाई अनुमति दिइएको छ।
तोकिएको समयभित्र आवश्यक सामग्री खरिद गरी आफ्ना निवासमा फर्किन तथा त्यसपछि कर्फ्यु आदेशको पूर्ण पालना गर्न प्रशासनले आग्रह गरेको छ।
कर्फ्यु अवधिमा पनि अस्पताल, फार्मेसी, हवाई सेवा, ग्यास आपूर्ति, पेट्रोलियम पदार्थको ढुवानी तथा बिक्री, एम्बुलेन्स, दमकल, शववाहन, खानेपानी तथा दूध बोक्ने सवारी, फोहोर व्यवस्थापन लगायतका अत्यावश्यक सेवाहरू भने नियमित रूपमा सञ्चालन हुने जनाइएको छ।
त्यसैगरी स्वास्थ्यकर्मी, सरकारी कर्मचारी, सञ्चारकर्मी, रेडक्रसकर्मी, तीर्थयात्री, बिरामी, विमानस्थल जाने–आउने यात्रु तथा उनीहरूलाई लिन–छोड्न जाने व्यक्तिहरू ले परिचयपत्र वा सम्बन्धित प्रमाणपत्र साथमा राखेमा आवतजावत गर्न सक्ने व्यवस्था गरिएको प्रशासनले जनाएको छ।
जिल्ला प्रशासन कार्यालयले सबै नागरिकलाई तोकिएको समयबाहेक कर्फ्यु आदेशको पूर्ण पालना गर्न तथा शान्ति र सुरक्षा कायम राख्न प्रशासनलाई सहयोग गर्न आग्रह गरेको छ।
यसैबीच शनिवार बिहान ८ बजे सद्भाव रैली सर्वपक्षीय निर्णय अनुसार निकालिने बुझिएकाे छ । शुक्रवार बिहान ६ बजेदेखि ८ बजेसम्म खुकुलाे गरिएकाे कफर्यु अवधि सद्भाव रैलीका लागि दुई थप बढाएर १० बजेसम्मका लागि कायम गरिएकाे बताइएकाे छ ।
यो विषयमा आफ्नो प्रतिक्रिया दिनुहोस् !