जनकपुरधाम । सिरहाको लहानस्थित आन्तरिक राजस्व कार्यालयका कर अधिकृत युवराज एमएस पाल ५ लाख रुपैयाँ घुस लिँदै गरेको अवस्थामा अख्तियार दुरुपयोग अनुसन्धान आयोगको टोलीले रंगेहात पक्राउ गरेको छ।
अख्तियार दुरुपयोग अनुसन्धान आयोगको बर्दिबास कार्यालयबाट खटिएको टोलीले सेवाग्राहीबाट ५ लाख रुपैयाँ घुस लिइरहेको अवस्थामा उनलाई कार्यालय परिसरबाटै नियन्त्रणमा लिएको हो।
प्रारम्भिक जानकारीअनुसार कर परीक्षण (फुल अडिट) प्रक्रिया अगाडि बढाइदिने भन्दै सेवाग्राहीसँग घुस रकम मागेको उजुरीका आधारमा अख्तियारले निगरानी बढाएको थियो। त्यसक्रममा घुस लिइरहेको अवस्थामा उनलाई पक्राउ गरिएको आयोगले जनाएको छ।
पक्राउ परेका कर अधिकृत पालमाथि भ्रष्टाचारसम्बन्धी कसुरमा थप अनुसन्धान भइरहेको अख्तियारले जनाएको छ।
यो विषयमा आफ्नो प्रतिक्रिया दिनुहोस् !