जनकपुरधाम । धनुषाको मुखियापट्टी मुसहरनिया गाउँपालिकाले शैक्षिक गुणस्तरीयताका लागि पालिकाको बजेटका ८० प्रतिशतसम्मको रकम शिक्षामा लगानी गर्दै आएको दाबी गरिएको छ ।
जनकपुरधाममा आयोजित प्रधानाध्यापकहरुको संगठन प्रधानाध्यापक संघ नेपालको मधेश प्रदेश स्तरीय सार्वजनिक शिक्षा रुपान्तरणमा विद्यालय नेतृत्व, स्थानीय सरकार र नीति निर्माणमा साझेदारी विषयक कार्यक्रममा गाउँपालिकाका अध्यक्ष जयकुमार यादवले बताएका छन् ।
कार्यक्रमको प्यानल डिस्कसनमा अध्यक्ष यादवले भने पालिकाको वडाध्यक्षको सिलिङ्ग बजेट बाहेक पालिका बजेटका ८० प्रतिशतको रकम शिक्षामै लगानी गर्ने गरेका छौं । उनले थप्दै भने संघीय र प्रदेश सरकारले उपेक्षा गरेपछि पालिकाकै बजेट शिक्षामा लगानी गर्दै आएका छौं ।
उनले आफ्नो कार्यकालअघि गाउँपालिकाका अधिकांश विद्यालयमा छाना, विद्युत्, बत्ती र पंखाजस्ता आधारभूत पूर्वाधारको अभाव रहेको उल्लेख गर्दै हाल अधिकांश विद्यालयमा छत ढलान, विद्युत् जडान तथा पंखाको व्यवस्था गरिएको बताए ।
गाउँपालिकाभित्र करिब ७ हजार विद्यार्थी अध्ययनरत रहेको जानकारी दिँदै उनले आफ्नो कार्यकालमा तीन वटा माध्यमिक विद्यालय, एक वटा निम्न माध्यमिक विद्यालय र दुई वटा प्राथमिक विद्यालय थपिएको तथा विभिन्न विद्यालयमा नयाँ कक्षाकोठा निर्माण गरिएको बताए ।
विद्यार्थीहरु गुणस्तरीय शिक्षा पाउन भन्ने उद्देश्यले निगरानी बढाएका छौं । विद्यालयमा शिक्षक र विद्यार्थी आए कि आएन, विद्यार्थी किन आएन, शिक्षक के कारणले अनुपस्थित भए, विद्यालयमा कति घण्टी पढाई भयो कि भएन, खाजामा आज विद्यार्थीलाई के दिइयो हरेक मोनेटरिङ्ग मोबाइलबाटै गर्दै आएको उनले बताए ।
यसका साथै वर्षौदेखि विद्यालयमै गाउँलेहरुले शादी विवाह लगायतका ठूलठूला कार्यक्रम गर्न विद्यालय भवन प्रयोग गर्दै आएको त्यो प्रवृति हटाउन हरेक गाउँमा एउटा सामुदायिक दलान निर्माण गराए सँगै प्रहरी चौकी एक विद्यालयमै रहेका कारण ५० लाख रुपैया खर्चेर नयाँ प्रहरी भवन बनाएर विद्यालयबाट प्रहरी चौकी हटाएको जानकारी समेत उनले दिए ।
यसका अलावा छोरीहरुलाई शिक्षाप्रति सक्रियता बढाउन उच्च मावि तहमा छात्राहरुका लागि निशुल्क बसको व्यवस्था गरिएको जानकारी समेत उनले दिए । फर्जी विद्यार्थीहरुलाई विद्यालयबाट हटाउनका साथै दलित, गरीब विपन्न विद्यार्थीहरुका लागि विशेष छात्रवृतिको व्यवस्था मुखियापट्टी मुसरहनिया गाउँपालिकाले गर्दै आएको बुझिएको छ ।
यो विषयमा आफ्नो प्रतिक्रिया दिनुहोस् !