जनकपुरधाम । कुटपिटबाट गम्भीर घाइते भएका जनकपुरधामका एक व्यक्तिको उपचार आर्थिक अभावका कारण प्रभावित बनेपछि पीडित परिवारले न्याय, क्षतिपूर्ति तथा उपचारका लागि आर्थिक सहयोग उपलब्ध गराउन सम्बन्धित निकायसँग गुहार गरेको छ।
जनकपुरधाम उपमहानगरपालिका–३ निवासी मानसिक सन्तुलन ठीक नरहेका मगनु भन्ने मगनी दास वैशाख ७ गतेदेखि हराएका थिए। त्यसक्रममा मागीचाँगी गर्दै महोत्तरीको जलेश्वर नगरपालिका–८ पुगेका बेला स्थानीय अमोद ठाकुरले ‘चोर–चोर’ भन्दै निर्ममतापूर्वक कुटपिट गरेको आरोप परिवारले लगाएको छ।
घटनामा गम्भीर घाइते भएका मगनीलाई प्रारम्भिक उपचारका लागि जलेश्वरस्थित प्रादेशिक अस्पताल लगिएको थियो। त्यहाँ उपचार सम्भव नभएपछि उनलाई जनकपुरधामस्थित प्रादेशिक अस्पताल रेफर गरिएको थियो। थप उपचार आवश्यक परेपछि हाल उनी जनकपुरधामस्थित स्वास्तिक अस्पतालमा उपचाररत छन्। स्थानीयवासीको सहयोगमा प्रहरीले उनलाई अस्पताल पुर्याएको बताइएको छ।
परिवारका अनुसार कुटपिटका कारण मगनीको बाँया खुट्टा नराम्ररी भाँचिएको, दायाँ हात टुटेको तथा छातीको बाँया भाग र टाउकोको पछाडिपट्टि गम्भीर चोट लागेको छ।
पीडितकी छोरी आरती देवी दासको जाहेरीका आधारमा पक्राउ परेका आरोपित अमोद ठाकुर हाल अनुसन्धानका लागि प्रहरी हिरासतमा रहेका छन्। पीडित पक्षले जिल्ला अदालतमा मुद्दासमेत दायर गरिसकेको जनाएको छ। तर अदालतबाट फैसला आउन ढिलाइ हुँदा उपचार व्यवस्थापनमा थप समस्या उत्पन्न भएको परिवारको गुनासो छ।
मंगलबार एक पत्रकार सम्मेलन आयाेजना गरी पीडितकी छोरी आरती देवी दासले अहिलेसम्म उपचारमा करिब ७ लाख रुपैयाँ खर्च भइसकेको जानकारी दिइन्। उनका अनुसार उपचारका लागि विभिन्न व्यक्तिसँग ऋण लिइएको छ भने घरका गरगहना समेत बिक्री गरिसकिएको छ।
“अहिलेसम्म ऋण र गरगहना बेचेर उपचार गराउँदै आएका छौं। तर अब आर्थिक स्रोत सकिएको छ। पीडक पक्षबाट हालसम्म एक रुपैयाँ पनि क्षतिपूर्ति प्राप्त भएको छैन,” उनले भनिन्।
आरतीका अनुसार मगनीको छाती र टाउकोको शल्यक्रिया अझै बाँकी छ। तर आवश्यक रकम अभाव भएपछि थप उपचार गराउन कठिनाइ भइरहेको छ। समयमै शल्यक्रिया हुन नसके बिरामीको ज्यानसमेत जोखिममा पर्न सक्ने चिकित्सकहरूले बताएको उनको भनाइ छ।
“अब के गर्ने भन्ने अन्योलमा छौं। उपचार खर्च जुटाउन नसक्दा बाबुको उपचार नै रोकिने अवस्था आएको छ। समयमै उपचार नभए बचाउनै कठिन हुने चिकित्सकहरूले बताएका छन्,” उनले भावुक हुँदै भनिन्।
पीडितका सालो रामबाबु दासले आरोपित ठाकुर करिब एक महिनादेखि थुनामा रहे पनि उपचार खर्च उपलब्ध गराउनेतर्फ कुनै चासो नदेखाएको आरोप लगाए। उनले जिल्ला अदालतबाट फैसला आउन ढिलाइ भइरहेका बेला आरोपित पक्षले पुनरावेदन अदालतमार्फत रिहाइको प्रयास गरिरहेको जानकारी आफूहरूले पाएको दाबी गरे।
“पीडितको अवस्था गम्भीर छ। समयमा उपचार नपाए ज्यानसमेत जान सक्छ। पछि अदालतको फैसला आए पनि मान्छे नै बचेन भने क्षतिपूर्ति लिएर के गर्ने ?” उनले प्रश्न गरे।
पीडित परिवारले दोषीमाथि कानुनी कारबाही, उचित क्षतिपूर्ति तथा उपचारका लागि तत्काल आर्थिक सहयोग उपलब्ध गराउन सरकार, मानवअधिकारकर्मी, नागरिक समाज तथा सम्बन्धित निकायसँग आग्रह गरेको छ। आर्थिक अभावका कारण गम्भीर घाइते व्यक्ति उपचारबाट वञ्चित हुने अवस्था सिर्जना भएको भन्दै परिवारले न्याय र मानवीय सहयोगका लागि सबैसँग अपिल गरेको छ।
यो विषयमा आफ्नो प्रतिक्रिया दिनुहोस् !