जनकपुरधाम, जेठ १९ । जनकपुरधामको जिरो माइल क्षेत्रमा सञ्चालन हुँदै आएको थोक फलफूल तथा तरकारी बजारकाे जग्गा खाली गर्न दुई महिना समय दिनुपर्ने व्यवसायीहरूले माग गर्दै आन्दाेलनमा उत्रेका छन् ।
उच्च अदालतकाे आदेशपछि प्रहरीकाे सहयाेगमा जग्गा धनीले बजारमा डाेजर चलाएपछि व्यवसायी व्यवस्थापनका लागि समयकाे माग गर्दै आन्दाेलनमा उत्रेका हुन ।
मंगलबार आयोजित पत्रकार सम्मेलनमा फलफूल तथा तरकारी व्यवसायीहरूको प्रतिनिधित्व गर्ने संघले बजार हटाउने निर्णयप्रति कुनै असहमति नरहेको स्पष्ट पारेको छ।
तर, वैकल्पिक स्थानको टुंगो नलाग्दै हतारमा बजार विस्थापित गर्दा व्यवसाय, रोजगारी र कृषि आपूर्ति प्रणालीमा गम्भीर असर पर्न सक्ने उनीहरूको भनाइ छ।
संघका महासचिव भूवनेश्वर पुर्वेले अदालतको आदेश आएलगत्तै बजार क्षेत्रमा डोजर प्रयोग गरी सडक अवरुद्ध बनाउने तथा शौचालय भत्काउने कार्य गरिएको आरोप लगाए। उनले व्यवसायीहरूलाई पूर्वतयारीका लागि पर्याप्त समय नदिइएको गुनासो गर्दै हाल आँप व्यापारको मुख्य सिजन भएकाले तत्काल बजार बन्द गर्दा ठूलो आर्थिक क्षति हुने बताए।
उनका अनुसार जिरो माइलको थोक बजारसँग प्रत्यक्ष तथा अप्रत्यक्ष रूपमा करिब दुई हजारभन्दा बढी व्यक्तिको जीविकोपार्जन जोडिएको छ।
किसानले उत्पादन गरेको तरकारी तथा फलफूल उपभोक्तासम्म पुर्याउने प्रमुख केन्द्रका रूपमा रहेको यो बजार बन्द हुँदा सम्पूर्ण आपूर्ति श्रृंखलामा असर पर्ने व्यवसायीहरूको दाबी छ।
पत्रकार सम्मेलनमा जनकपुरधाम उद्योग वाणिज्य संघले पनि व्यवसायीहरूको मागलाई समर्थन गरेको छ। संघका अध्यक्ष सुरेन्द्र भण्डारीले अदालतको आदेश कार्यान्वयन आवश्यक भए पनि त्यस क्रममा मानवीय संवेदनशीलता र दीर्घकालीन व्यवस्थापनलाई प्राथमिकता दिनुपर्ने बताए।
उनले वर्षौंदेखि सञ्चालनमा रहेको बजारलाई वैकल्पिक व्यवस्था बिना हटाउँदा व्यवसायी मात्र होइन, मजदुर, ढुवानी व्यवसायी, किसान र उपभोक्तासमेत प्रभावित हुने उल्लेख गरे।
सरोकारवाला निकायले सबै पक्षसँग समन्वय गरेर व्यवहारिक समाधान खोज्नुपर्ने उनको सुझाव छ।
पुनरावेदन अदालतको आदेशपछि जग्गा खाली गराउने प्रक्रिया अघि बढिरहेको अवस्थामा जिरो माइल थोक बजारको भविष्य अहिले जनकपुरधामको प्रमुख सार्वजनिक चासोको विषय बनेको छ।
यो विषयमा आफ्नो प्रतिक्रिया दिनुहोस् !