जनकपुरधाम । धनुषाको मुखियापट्टी मुसहरनिया गाउँपालिका–३ तुल्सीयाही चमरटोलीमा दलित समुदायका लागि उपचारित बाँसबाट निर्माण भइरहेको सुरक्षित आवास परियोजनामा इन्जिनियरिङ अध्ययनरत विद्यार्थी तथा शिक्षकहरूले प्रत्यक्ष सहभागिता जनाएका छन्।
सुरक्षित आवास कार्यक्रमअन्तर्गत हेबिटाट फर ह्युम्यानिटी नेपाल र मुखियापट्टी मुसहरनिया गाउँपालिकाको सहयोगमा सामुदायिक सुधार केन्द्र (सीआईसी) मार्फत निर्माणाधीन उपचारित बाँसका घरहरूको स्थलगत अवलोकन गर्दै विद्यार्थीहरूले निर्माण प्रक्रियाबारे जानकारी लिनुका साथै विभिन्न निर्माण गतिविधिमा समेत सहभागिता जनाएका हुन्।
‘दिगो आवास अभ्यासहरू प्रवर्द्धन गर्न युवा संलग्नता’ विषयक कार्यक्रमअन्तर्गत सेन्ट्रल इन्जिनियरिङ कलेजका २० जना विद्यार्थी र दुई जना शिक्षकले निर्माणस्थलको निरीक्षण गरेका थिए। उनीहरूले उपचारित बाँसलाई सुरक्षित तथा वातावरणमैत्री निर्माण सामग्रीका रूपमा कसरी प्रयोग गरिन्छ, यसको टिकाउपन, संरचनागत मजबुती तथा निर्माण प्रविधिबारे प्रत्यक्ष जानकारी प्राप्त गरेका थिए।
कार्यक्रमका संयोजक वीरेन्द्रलाल कर्णले कार्यक्रमको उद्देश्य, दिगो तथा विपद् प्रतिरोधी आवास निर्माणको आवश्यकता र समुदायमा यसको प्रभावबारे प्रकाश पारेका थिए। त्यसैगरी साइट इन्जिनियर कमलेश यादवले उपचारित बाँसको प्रयोग, घर निर्माणको प्राविधिक प्रक्रिया, गुणस्तर व्यवस्थापन तथा सुरक्षा मापदण्डबारे विस्तृत जानकारी गराएका थिए।
कार्यक्रमका क्रममा सहभागी विद्यार्थीहरूले ब्लक निर्माण, बाँस चिर्ने तथा बत्ती फाड्ने, टाटी ठोक्ने लगायतका व्यवहारिक निर्माण कार्यमा समेत प्रत्यक्ष सहभागिता जनाएका थिए। यसबाट विद्यार्थीहरूले कक्षाकोठामा सिकेको प्राविधिक ज्ञानलाई व्यवहारमा प्रयोग गर्ने अवसर प्राप्त गरेको आयोजकले जनाएको छ।
सीआईसीका अनुसार सुरक्षित आवास कार्यक्रमअन्तर्गत धनुषाकै गणेशमान चारनाथ नगरपालिकामा समेत दलित समुदायका लागि उपचारित बाँसबाट सुरक्षित घर निर्माण गरी हस्तान्तरण गरिसकिएको छ। उक्त नगरपालिकामा २८ दलित परिवारका लागि निर्माण गरिएका सुरक्षित तथा दिगो आवासहरू लाभग्राहीलाई हस्तान्तरण भइसकेका छन्।
आयोजकका अनुसार उपचारित बाँसबाट निर्मित यस्ता घरहरू कम लागतमा निर्माण गर्न सकिने, वातावरणमैत्री हुने तथा विपद्को जोखिम न्यूनीकरणमा समेत प्रभावकारी हुने भएकाले ग्रामीण तथा विपन्न समुदायका लागि उपयुक्त विकल्पका रूपमा स्थापित हुँदै गइरहेका छन्।
यो विषयमा आफ्नो प्रतिक्रिया दिनुहोस् !