जनकपुरधाम । धनुषाको मिथिला नगरपालिका–७ ढल्केबरमा रहेको एक औषधि पसलमा प्रहरीले छापामारी गरी ठूलो परिमाणमा लागूऔषध बरामद गरेको छ । छापामार कारबाहीका क्रममा पसल सञ्चालकलाई पनि नियन्त्रणमा लिइएको प्रहरीले जनाएको छ।
इलाका प्रहरी कार्यालय ढल्केबरका अनुसार ‘निको फार्मेसी’ सञ्चालन गर्दै आएका करिब ५० वर्षीय रामकुमार महतो मंगलबार साँझ पक्राउ परेका हुन्। उनी सोही स्थानमा ‘अनु मेडिकल हल’ समेत सञ्चालन गर्दै आएका थिए।
प्रहरी निरीक्षक लक्ष्मण केसीले अनु मेडिकलबाट अवैध रूपमा लागूऔषध बिक्री भइरहेको गोप्य सूचनाको आधारमा छापा हान्दा ठूलो परिमाणमा औषधि फेला परेको जानकारी दिए।
प्रहरीले पसलबाट टापेन्टा ट्याब्लेट ४६० पत्ताबाट ७ हजार ६ सय पिस, स्पासरेस्ट २० मिलिग्राम ९५ पत्ताबाट ९५० पिस, डोवेल ७५ मिलिग्राम ६० पत्ताबाट ६०० पिस तथा डोवेल १०० मिलिग्राम ९४४ पिस बरामद गरेको जनाएको छ। साथै नगद १ लाख ३५ हजार रुपैयाँ समेत फेला परेको प्रहरीले जनाएको छ।
यसअघि मिथिला नगरपालिका–१० रातुपुल क्षेत्रमा शंकास्पद अवस्थामा हिँडिरहेका तीन युवालाई जाँच गर्दा उनीहरूबाट टापेन्टा ४० पिस र स्पासरेस्ट ४० पिस बरामद भएको थियो। पक्राउ पर्नेमा सिन्धुली दुधौली नगरपालिका–५ का २० वर्षीय साजन परियार, २१ वर्षीय दोर्जे लामा र २० वर्षीय दीपेश साह रहेका छन्।
ती युवामाथि सोधपुछका क्रममा लागूऔषध आपूर्तिको स्रोत अनु मेडिकल भएको खुल्न आएपछि प्रहरीले पसलमा छापा मारेको हो। त्यसपछि सञ्चालक महतोलाई नियन्त्रणमा लिइएको प्रहरीले जनाएको छ।
पक्राउ परेका महतो राजनीतिक पृष्ठभूमिका व्यक्ति भएको खुलेको छ। उनी तत्कालीन नेकपा (माओवादी केन्द्र) का स्थानीय नेता रहेको बताइएको छ।
२०७० सालमा धनुषा क्षेत्र नम्बर ७ बाट संविधानसभा सदस्यमा उम्मेदवार बनेका महतो २०७९ को स्थानीय तह निर्वाचनमा मिथिला नगरपालिकाको नगरप्रमुख पदका प्रत्याशी समेत थिए। उनी माओवादी केन्द्र मिथिला नगरपालिकाको नगर सभापति समेत रहिसकेका छन्।
यो विषयमा आफ्नो प्रतिक्रिया दिनुहोस् !